Shymkentte antıkor tóraǵasynyń burynǵy orynbasary 11 jylǵa sottaldy

ShYMKENT. KAZINFORM - Ol mektep dırektorynan 42 mıllıon teńge alǵany úshin kináli dep tanyldy.

Shymkent qalasynyń qylmystyq ister jónindegi mamandandyrylǵan aýdanaralyq sotynda Shymkent qalalyq sybaılas jemqorlyqqa qarsy qyzmet departamenti tóraǵasynyń burynǵy orynbasary Dáýrenbek Qojabaevqa qatysty qylmystyq is qaraldy. Oǵan «Asa iri kólemde para alý» baby boıynsha aıyp taǵyldy.

- Sot sottalýshyny QK-niń 366-babynyń 4-bóligimen kináli dep tanyp, oǵan memlekettik qyzmette laýazymdy qyzmet atqarý quqyǵynan ómir boıyna aıyryp, 11 jyl merzimge bas bostandyǵynan aıyrý jazasyn taǵaıyndap, oǵan jazany qylmystyq-atqarý júıesiniń ortasha qaýipsiz mekemelerinde óteý belgiledi. Úkim zańdy kúshine engen joq, - delingen Shymkent qalasynyń QІJMS-nyń baspasóz qyzmeti usynǵan aqparatta.

Aıta, keteıik, budan buryn Halyqaralyq izdeý jarııalanǵan Dáýrenbek Qojabaev ustalǵan bolatyn.

Sondaı-aq, Túrkistan oblysynda bilim salasynyń qyzmetkerleri 547 mıllıon teńgeden astam qarjy jymqyrdy degen aıyppen sottalǵanyn jazdyq.