Shymkentte 4 emhana senimgerlik basqarýǵa beriledi

ShYMKENT. KAZINFORM – Emhanalardy senimgerlik basqarýǵa berý merzimi men qarjylandyrý kózderi naqtylandy.

Shymkent qalalyq densaýlyq saqtaý basqarmasynyń basshysy Qaırat Qalıbekovtyń aıtýynsha, búginde eski tıpte salynǵan, tozyǵy jetken №4, 9, 10, 11 emhanalardy senimgerlik basqarýǵa berý jobasy iske asyrylyp jatyr.

Atalǵan másele qazirgi ýaqytta Densaýlyq saqtaý mınıstrligimen kelisý satysynda tur. 

– Úsh qabatty №4 emhana 1938 jyly salynǵan. №9 emhana 1962-1964 jyldary asar ádisimen turǵyzylǵan, onyń tórt ǵımaraty laıdan salynǵan ári kúrdeli jóndeýge de múmkindik joq. №10 emhana dárigerlik ambýlatorııa retinde salynǵandyqtan, qazirgi talaptarǵa saı kelmeıdi. №11 qalalyq emhananyń ǵımaraty da osyndaı jaǵdaıda, - dedi ol baspasóz máslıhatynda.

Basqarma basshysy senimgerlik basqarýǵa berýge qyzyǵýshylyq tanytqandar bar ekenin atap ótti. Túpkilikti sheshim konkýrs nátıjeleri boıynsha qabyldanady.

– Aldaǵy jyldary jańadan ashylǵan móltekaýdandarda qala bıýdjeti esebinen eki jańa emhana salý josparlanyp otyr. Alaıda mundaı shyǵyndy bıýdjet bir mezgilde kótere almaıdy. Osyǵan baılanysty ózge óńirlerdiń tájirıbesi qaraldy. Máselen, Qyzylorda qalasynda 14,7 mlrd teńgege jańa emhana salynyp jatyr. Sondyqtan bul mekemeler senimgerlik basqarý tetigi aıasynda aıqyndaldy. Densaýlyq saqtaý mınıstrligimen kelisilgen jaǵdaıda, joba odan ári júzege asyrylady, - dedi ol.

Budan buryn Shymkentte senimgerlik basqarýǵa berilgen memlekettik kásiporyn memleketke qaıtarylǵanyn jazǵan edik.