Shymkent jylytý maýsymyna qalaı daıyndalyp jatyr
ShYMKENT. KAZINFORM - Shymkent qalasynda aldaǵy jylytý maýsymyna daıyndyq jumystary qarqyndy júrip jatyr. Qalany jylýmen qamtıtyn «Qýatjylýortalyq-3» mekemesiniń málimetinshe, barlyq is-sharalar qyrkúıek aıynyń sońyna deıin tolyq aıaqtalmaq.
Qazirgi tańda 27 qazandyqtyń 22-si iske qosýǵa daıyn. Kásiporynnyń ınvestıtsııalyq baǵdarlamasy aıasynda 0,45 shaqyrym jylý jelisi qaıta jańǵyrtylyp, taǵy 33,2 shaqyrymy bıýdjet qarajaty esebinen jóndelip jatyr.
— Qýattylyǵy 160 Gkal bolatyn úsh qazandyqqa kúrdeli jóndeý júrgizilip jatyr jáne sorǵylar jańartylýda. Barlyq jumystar kestege saı júzege asyp keledi, — dedi kásiporynnyń óndiristik-tehnıkalyq bóliminiń basshysy Tynybek Berdıev.
Jelilerdiń tozýy
«Qýatjylýortalyq-3» qaramaǵynda jalpy uzyndyǵy 823 shaqyrym jylý jelisi bar. Mamandardyń aıtýynsha, qaladaǵy jelilerdiń tozý deńgeıi 37 paıyzdy quraıdy. Bıyl sorǵy stantsııalaryn jańǵyrtý josparlanbaǵanymen, 17 stantsııanyń 13-i qysqy maýsymǵa daıyndalǵan.
Erekshe nazar kópqabatty úılerdiń ishki júıelerine aýdarylyp otyr. Olardy daıyndaý men jýyp-shaıý turǵyn úı-kommýnaldyq kooperatıvteriniń, ákimdikter men turǵyndardyń mindetinde. Kompanııa ókilderi jylý júıesi qysymmen jýyp shaıylmaǵan úılerdiń jylýǵa qosylmaıtynyn eskertti.
Tutynýshylardyń qaryzy
Jylýǵa qatysty qaryz máselesi sheshimin tappaı otyr. Qala turǵyndary men kásiporyndarynyń jalpy bereshegi 973 mıllıon teńgeden asqan. Onyń ishinde:
- 464 610 69 mln teńge – jeke tulǵalardyń qaryzy,
- 508 715 103 mln teńge – zańdy tulǵalardyń qaryzy.
Debıtorlyq bereshekti azaıtý maqsatynda kommýnaldyq kásiporyn halyqpen túsindirý jumystaryn júrgizip, keı jaǵdaıda sotqa júginýge májbúr bolyp otyr.
Turǵyndarmen baılanys jáne apattyq qyzmetter
Jylytý maýsymynyń bastalýy jóninde halyqqa aqparat dástúrli túrde BAQ arqyly jetkiziledi. Sonymen qatar, iKomek 109 biryńǵaı baılanys ortalyǵy jáne táýlik boıy jumys isteıtin dıspetcherlik qyzmet turǵyndar ótinishterin qabyldaıdy: 8 (7252) 44-81-89, 8 (7252) 44-82-37.
Shaǵymdardyń kóbi Turan aýdanynan túsedi. Sebebi, bul aımaqta eski jáne ıesiz úıler kóp. Jylý sapasyna baılanysty ótinishter jeke qaralyp, kásiporyn ınspektorlary úıishilik júıelerge deıin baryp aqaýlardy joıýda.
Qala kommýnaldyq qyzmetiniń qaramaǵynda táýlik boıy jumys isteıtin 5 apattyq brıgada jáne 3 dıspetcherlik qyzmet bar.
— Ótken jylytý maýsymynda magıstraldyq jelilerde 6 apat tirkelip, barlyǵy tótenshe jaǵdaıǵa ulastyrmaı joıyldy. Úıishilik júıelerde 126 aqaý anyqtalyp, der kezinde jóndeldi, — dep málimdedi «Qýatjylýortalyq-3» mekemesiniń ókilderi.
Aıta keteıik, budan buryn Túrkistan oblysynyń jylý maýsymyna daıyndyǵyn jazǵan bolatynbyz.