Shymkent medıtsınalyq týrızm ortalyǵyna aınalmaq
ASTANA. KAZINFORM — Qazaqstandaǵy 3-shi megapolıs medıtsınalyq týrızmdi myqtap qolǵa alǵaly otyr, dep habarlaıdy Jibek Joly telearnasy.
Shymkentke týrıstter demalyp, dámdi as-aýqat ishý úshin ǵana kelmeıdi. Endi munda densaýlyǵyn túzetip, eń myqty degen dárigerlerden járdem alýǵa bolady. Qazirdiń ózinde densaýlyǵyn retteýge Ózbekstan, Tájikstan, Reseı, tipti Qytaıdan da emdelýshiler kele bastaǵan. Ásirese, kardıologııa, neırohırýrgııa jáne ortopedııa boıynsha kúrdeli otalar jasalyp jatyr.
Abdýlahaı Qasymov Shymkentti óziniń ekinshi ret dúnıege kelgen jeri sanaıdy. Óıtkeni Tájikstan azamaty osydan biraz ýaqyt buryn ınsýlt alyp, qatty naýqastanyp qalǵan. Dýshanbedegi dárigerleri oǵan mı qantamyrlaryna zaqym kelgenin aıtyp, shuǵyl operatsııa jasatý úshin Qazaqstanǵa barýǵa keńes beripti. Sóıtip, azamat Shymkentke kelgen.
— Biz jaqta tekserip, jaǵdaıdyń kúrdeli ekenin aıtty. Qazaqstanǵa barýǵa keńes berdi. Habarlastyq, keldik — qazir ózimdi tamasha sezinemin. Erkin júrip-turamyn, uıqym tynysh, basym aınalmaıdy. Bári jaqsy, — dedi Abdýlahaı Kasymov.
Abdýlahaıǵa Shymkenttegi ekinshi qalalyq aýrýhanasynda ota jasalǵan. Bári sátti ótip, endi aýrýhanadan úıine shyǵarylyp jatyr. Oǵan operatsııa jasaý kezinde qazaq hırýrgteri az ınvazıvti ádisti qoldanypty. Bul stresti azaıtyp, tez ońalýǵa múmkindik beretin ádis desedi.
— Insýltten keıingi jaǵdaı mıdy qorektendiretin tamyrlardyń aýrýlary bolady. Malformatsııa, anevrızma ınsýltke ákeletin. Iá, bolmasa tamyr bitele bastaıdy, buny ateroskleroz deıdi. Qıyn jerde ornalasqan isikter bolady. Oǵan jaqsy mıkroskop, tájirıbeli maman talap etetin jaǵdaılarda ota jasalýy kerek. Olar bir-birinen estip, tańdaý jasaıdy. Qanshama adam osynda ota jasatyp ketip jatyr. Sátti ótip jatyr, — dedi neırohırýrg Marat Qulmyrzaev.
Shymkenttegi aqyly medıtsınalyq qyzmetter — Ortalyq Azııadaǵy eń qoljetimdi qyzmettiń biri. Emdelýshiler kórshiles elderden ǵana emes, sonaý Eýropadan da kelip jatady. Bizdiń mamandar ózimizde ǵana emes, sondaı-aq tájirıbesimen almasyp, shetelge de shyǵady.
— Bizdiń dárigerlerimizdiń, bizdiń mamandarymyzdyń biliktiligi ǵoı. Sony da biz kóterý úshin ekinshi jyl qatarynan shetelde oqytyp jatyrmyz. Byltyr 120 adamdy osynda kelip oqytqan. Bıylǵy jyly da 120-130 adamdy oqytamyz, master klaspen de shyǵady. Óıtkeni baryp tájirıbe kórgen de durys dep jatyrmyz, — dep atap ótti Shymkent qalasynyń densaýlyq saqtaý basqarmasynyń basshysy Nurlybek Asylbekov.
Osylaısha Shymkent medıtsınalyq týrızm baǵytynda naǵyz kóshbasshyǵa aınalýǵa úmitti. Qansha jerden synasa da, qazir jalpy Qazaqstan medıtsınasyna degen senim birshama artyp keledi. Bul qýantatyn jaǵdaı. Oǵan Qazaqstanǵa kelip saýyǵyp, úıine qaıtyp jatqan týrıstterdiń alǵysy dálel.
Osydan buryn Shymkentte salmaǵy 7 keli alyp sábı dúnıege kelgenin jazǵan edik.