Shymkent qar qursaýynda qaldy
ShYMKENT. KAZINFORM — Ońtústikte kún saýytty. Qalyń jaýǵan qardyń saldarynan joldarda muz qatyp, jol-kólik qozǵalysy qıyndaı tústi, dep habarlaıdy QazAqparat tilshisi.
Keshe, 14 jeltoqsan kúni Shymkentte aýa temperatýrasy +13°C-qa deıin jetkenimen, búgin qalany qalyń qar basyp qaldy. Qolaısyz aýa raıynan kólikpen júrý qıyndaı tústi. Jeldiń de jyldamdyǵy sekýndtyna 20 metrge jetip, turǵyndarǵa qosymsha qıyndyqtar keltirip jatyr.
Jergilikti turǵyndar Shymkentte mundaı qar kópten beri bolmaǵanyn aıtýda. Ádette, qalada qar tez erip ketetin. Al bul joly qys qaharyna minip tur. Bul qalany tazartatyn kommýnaldyq sharýashylyq salasynyń qyzmetkerlerine de qıyndyq týdyryp otyr.
Qazirgi kezde kommýnaldyq jáne tótenshe jaǵdaılar qyzmeti kúsheıtilgen rejımde jumys istep, joldardy qardan tazalaýda. Alaıda, japalaqtap jaýǵan qar olar tazalap ketken joldy áp-sátte-aq aq ulpaǵa qaıta toltyryp jatyr.
Qalanyń basty kóshelerin tazalaýǵa memlekettik-jekemenshik áriptestik negizinde 189 arnaıy tehnıka men 500-den astam qyzmetker jumyldyryldy. Taǵy 114 kommýnaldyq qyzmetshi saıabaqtar men alańdardaǵy jaıaý júrginshiler aýmaqtaryn tazalap jatyr.
Abaı aýdanynda 80 basty kóshege ınertti materıaldar sebilip, qardan tazartyldy. 31 birlik arnaıy tehnıka men 100 adam qardy tazalaý jumystaryna jumyldyryldy. Sondaı-aq kósheler men aýlalardy tazalaýǵa qosymsha 11 tehnıka men 50 qyzmetker tartyldy. 10 kólik trotýarlardy tazartyp jatyr.
Ál-Farabı aýdanynda 30 adam men 6 arnaıy tehnıka tazalyq jumystaryn júrgizýde.
Qarataý aýdanyndaǵy 638 kósheni, onyń ishinde áleýmettik nysandar ornalasqan 128 kóshe men jaıaý júrginshiler jolyn tazalaýǵa 100 jumysshy men 12 birlik arnaıy tehnıka jumyldyrylǵan.
Turan aýdanynda qar tazalaý jumystaryna 227 adam men 43 birlik arnaıy tehnıka tartyldy.
Polıtsııa qyzmetkerleri turǵyndardy asa qajet bolmasa uzaq jolǵa shyqpaýǵa shaqyryp otyr. Sondaı-aq, jol erejelerin saqtap, muqııat bolý kerektigi eskertildi.
— Júrgizýshiler, ásirese, kóktaıǵaq kezinde apat qaýpin azaıtý úshin jyldamdyqty azaıtyp, aldyńǵy kólikke deıingi qashyqtyqty uzartý kerek. Jaıaý júrginshiler de abaı bolǵany jón, óıtkeni joldardaǵy kóktaıǵaq kólikterdiń tejeýin qıyndatady, — dep habarlady Shymkent qalalyq polıtsııa departamenti.
Aýa-raıynyń nasharlaýyna baılanysty Shymkent áýejaıynda da problemalar týyndap, reısterdiń keshigýi jarııalanǵan. Máselen, saǵat 06:55–ke josparlanǵan KC971 Almaty-Shymkent reısi 23:10–ǵa shegerildi. Sondaı-aq, DV707 Shymkent-Almaty reısi birneshe saǵatqa keshigip jatyr.
— Boljam boıynsha aýa-raıy Shymkent áýejaıynda ushyp-qonýǵa múmkindik bermeıdi, sondyqtan joǵaryda kórsetilgen ushý ýaqyty keıinge shegerilýi múmkin. Jolaýshylar reısterdiń jaǵdaıy men kestedegi yqtımal ózgerister týraly aqparatty avıakompanııadan, sondaı-aq Shymkent áýejaıynyń resmı saıtynan ala alady, — dep túsindirdi áýejaıdyń baspasóz qyzmeti.
Sınoptıkterdiń boljaýynsha, aldaǵy kúnderi Shymkentte kún kúrt sýytady. 16 jeltoqsanda túnde aýa temperatýrasy -17°C deıin tómendeýi múmkin.