«Shyǵys» óńirlik áskeriniń burynǵy qolbasshysy ustaldy – Antıkor

ASTANA. KAZINFORM — Antıkor otstavkadaǵy general-maıorǵa qatysty qylmystyq isti tergep jatyr. Bul týraly Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov málim etti. 

— Sybaılas jemqorlyqqa qarsy is-qımyl agenttigi «Shyǵys» óńirlik qolbasshylyǵy áskerleriniń burynǵy qolbasshysy, otstavkadaǵy general-maıorǵa qatysty qylmystyq isti tergep jatyr. Ol adal kásipkerdiń senimin teris paıdalanyp, joǵary laýazymdy áskerı tulǵa retindegi bedelin qoldanyp, asa iri kólemde qarjy ıemdengen. Qylmys Qazaqstan aýmaǵynda áleýmettik jobalarǵa ınvestıtsııa salýdan joǵary tabys tabýǵa bolady degen syltaýmen, mınıstrlikter men sheteldik seriktesterdiń yqpaldy ókilderiniń qoldaýymen júzege asady degen jeleýmen jasalǵan, — dedi Danııar Bıgaıdarov vedomstvoda ótken baspasóz máslıhatynda.

Resmı ókildiń málimdeýinshe, sottyń sanktsııasymen kúdikti qamaýǵa alyndy.

— Kúdiktiniń basqa da qylmystyq quqyq buzýshylyqtarǵa qatysy bar-joǵy tekserilip jatyr. Tergeý jalǵasyp jatyr, — dep tolyqtyrdy Antıkor ókili.

Buǵan deıin habarlaǵanymyzdaı burynǵy Ádilet mınıstri Marat Beketaev 9 jylǵa sottaldy.