Shyǵys Qazaqstanda taǵy da qar kóshkini túsirildi
ÓSKEMEN. KAZINFORM – Shyǵys Qazaqstan oblysynda jasandy jolmen qar kóshkini júrgizildi.
«Qazseldenqorǵaý» mekemesiniń mamandary baqylaý júrgizgennen keıin profılaktıkalyq qar kóshkinin túsirý týraly sheshim qabyldandy. ShQO TJD qyzmetkerleri jumystyń qaýipsizdigin qamtamasyz etti.
- «Óskemen-Tarǵyn-Samar» tasjolyndaǵy taý bókterinde birneshe jarylys jasaldy. Sonyń nátıjesinde barlyǵy 5100 tekshe metr qar túsirildi. Qar joldy tolyqtaı jaýyp qaldy. Arnaıy tehnıka birden joldy qardan tazartty, - dep habarlady oblystyq Tótenshe jaǵdaılar departamentiniń baspasóz qyzmeti.
Aıta keteıik, óńirde qar kóshkini qaýpi bar kezeńniń basynan beri 59 ret profılaktıkalyq kóshkin júrgizildi. Barlyǵy 51465 tekshe metr qar túsirilgen.
Eske salsaq, buǵan deıin áleýmettik jelide Óskemen qalasynda tótenshe jaǵdaı engizilgeni týraly tarap jatqan aqparat shyndyqqa sáıkes kelmeıtindigi habarlanǵan.