Shyǵys Qazaqstan oblysynyń keıbir jerinde sý deńgeıi kóterilip jatyr

ASTANA. KAZINFORM - Shyǵys Qazaqstan oblysy Tótenshe jaǵdaılar departamenti basshysy Erǵalı Bahaev óńirdegi sýdyń deńgeıine qatysty túsinik berdi.

«Óńirdiń taýly aýmaqtaryndaǵy qar jamylǵysyn jáne qazir jańbyr jaýyp turǵanyn eskere otyryp, keıbir jerlerde sý deńgeıi kóterilip jatyr. Jergilikti atqarýshy organdarmen birlesip tıisti jumystardy atqardyq. Sonymen qatar, kúndelikti oblys ákimdigimen birlese áýeden jáne basqa da joldarmen baqylaýdy iske asyryp jatyrmyz», - dedi E.Bahaev Ortalyq kommýnıkatsııalar qyzmetindegi brıfıngide.

Onyń aıtýynsha, el aýmaǵynda sý basý bastalǵaly ShQO-da sý tasqyny bolmaǵan.

«Degenmen, 1-2 jerde sý kóterilýi saldarynan naýryz aıynan bastap úsh úıge sý kirgen. Onyń bireýi Úlken Naryn aýdanynda, al qalǵan ekeýi Altaı aýdanynda. Qazir bul jerler qurǵatyldy, ıaǵnı qaýip joq. Atap aıtqanda, qutqarýshylar tıisti jumystaryn jalǵastyryp jatyr. Sınoptıkterdiń málimetinshe, 2-3 kún jańbyr bolady», - dedi Erǵalı Bahaev.