Shıgeo Katsý «Tsesnabank» AQ Dırektorlar keńesiniń tóraǵasy boldy

ASTANA. QazAqparat - Nazarbaev Ýnıversıtetiniń prezıdenti, Nazarbaev Zııatkerlik mektepteri Qamqorshylyq keńesiniń tóraǵasy jáne Nazarbaev Qory Qamqorshylyq keńesiniń múshesi Shıgeo Katsý «Tsesnabank» AQ Dırektorlar keńesiniń tóraǵasy boldy. Bul týraly Nazarbaev Ýnıversıtetiniń baspasóz qyzmetinen málim etti, dep habarlaıdy QazAqparat.

Shıgeo Katsý Nazarbaev Ýnıversıtetin 2010 jyldyń jeltoqsan aıynan beri basqaryp keledi. Oǵan deıin, óziniń 30 jyldyq eńbek tájirıbesinde Dúnıejúzilik bankte túrli qyzmetterdi atqardy. Atap aıtqanda, Azııa, Afrıka jáne Eýropa elderiniń qarjy sektoryndaǵy reformalarǵa jetekshilik etti, Eýropa jáne Ortalyq Azııa óńirleri boıynsha túrli laýazymdardy, sondaı-aq vıtse-prezıdent laýazymynda boldy.

Budan bólek, Bekjan Pirmatov «Tsesnabank» AQ Basqarma tóraǵasy bolyp taǵaıyndaldy. Ol buǵan deıin «First Heartland Bank» (FHB) AQ Basqarma tóraǵasynyń orynbasary boldy. Pirmatov bank sektorynda 2004 jyldan beri eńbek etedi. Ol óz mansabyn Korporatıvtik qarym-qatynastar basqarmasynda jetekshi menedjer retinde bastady. Keıin ol jergilikti jáne sheteldik bankterde, atap aıtqanda, «Kaspıı Bank» AQ, «Turan Álem Bank» AQ, «HSBC Bank Kazakhstan» Enshiles banki» AQ, «Qazkommertsbank» AQ-da korporatıvtik klıenttermen jumys jónindegi bólimderdi basqardy. FHB-ǵa kelgenge deıin Eýropalyq qaıta qurý jáne damý bankinde jetekshi bankır boldy. Onda ónerkásip, kommertsııa, agrobıznes jáne tabıǵı resýrstar salalaryndaǵy iri korporatıvtik klıentterdiń jumysyna jaýap berdi.

Buǵan deıin «First Heartland Securities» AQ «Tsesnabank» AQ aktsııalarynyń baqylaý paketin satyp alǵanyn habarlaǵan bolatynbyz.