Sheteldikterge yqtııarhat alý jeńildeıdi

ASTANA. KAZINFORM – Sheteldikterdiń yqtııarhat alýyn jeńildetetin suranysqa ıe kásipter tizbesi ózgeredi. «Ashyq NQA» portalynda ózgerister jobasy jarııalandy. 

Qujat QR Eńbek jáne halyqty áleýmettik qorǵaý mınıstrligi densaýlyq saqtaý, mádenıet jáne aqparat, tsıfrlyq damý jáne aeroǵarysh ónerkásibi mınıstrlikteriniń usynystary negizinde ázirlengen.

«Sheteldikterdiń Qazaqstan Respýblıkasynda turaqty turýǵa ruqsat alýy úshin talap etiletin kásipter tizbesine ózgerister men tolyqtyrýlar engizý josparlanyp otyr», - dep jazylǵan qujatta.

Bul tizimge densaýlyq saqtaý, jaratylystaný ǵylymdary, óńdeý ónerkásibi, IT-tehnologııalar, ınnovatsııalar jáne aeroǵarysh ónerkásibi jáne basqa da mamandyqtar kirgen.

«Tizbede barlyǵy suranysqa ıe 51 kásip qarastyrylady», - dep habarlady QR Eńbek jáne halyqty áleýmettik qorǵaý mınıstrligi.

Munda salalyq memlekettik organdar usynatyn ózgerister men tolyqtyrýlar eskerilgen. Suranysqa ıe mamandyqtar qatarynda jasandy ıntellekt ınjenerleri, web ázirleýshiler, mobıldi qosymshalardy ázirleýshiler, kompıýterlik oıyndardy ázirleýshiler, aqparattyq júıeler sáýletshileri, server ákimshileri, aqparattyq qaýipsizdik mamany, grafıkalyq dızaınerler, sýretshi ıllıýstratorlar, akýsher gınekologtar, anestezıolog-reanımatologtar, sáýlelik dıagnostıka dárigerleri bar.

Tizbede kórsetilgen mamandyqtary bar sheteldikter ishki ister organdarynda turýǵa yqtııarhatty ońaılatylǵan tártippen resimdeı alady. Yqtııarhat 10 jylǵa ne pasporttyń qoldanylý merzimine beriledi.

NQA jobasymen 13 naýryzǵa deıin tanysýǵa bolady.