Sheteldik azamatpen nekege turý úshin qandaı qujattar qajet

ASTANA. KAZINFORM — Qazaqstanda sheteldik azamatpen nekege turý úshin mindetti túrde AHAT bólimine baryp, ótinish berý kerek, dep jazdy Kazinform agenttiginiń tilshisi.

Qazirgi tańda Qazaqstanda nekege turý úshin qujattardy tapsyrýdyń eki joly bar:

1. AHAT bólimine baryp, ótinish jazý.

   Bul jaǵdaıda qalyńdyq pen kúıeý jigittiń ekeýi de jeke kelýi qajet, árqaısysy qujattardy óz qolymen toltyrady.

2. Onlaın tapsyrý.

   Elektrondy úkimet portaly (eGov) nemese ekinshi deńgeıli bankterdiń mobıldi qosymshalary arqyly ótinish berýge bolady. Munda eki taraptyń da ETsQ (elektrondyq tsıfrlyq qoltańbasy) bolýy qajet.

   Aldymen bir tarap ótinish beredi, ekinshisi ony rastaýy tıis. Osydan keıin bolashaq juptar 15 kún ishinde AHAT bólimine baryp, qujattarǵa qol qoıýy kerek. Bul kezeńde eki taraptyń da jeke kelýi mindetti. Eger bireýi kelmese, ótinish avtomatty túrde joıylady.

Sheteldikpen nekege turý kezindegi qosymsha talaptar

Pavlodar qalasy AHAT bóliminiń basshysy mindetin atqarýshy Inesh Maýsenovanyń aıtýynsha, eger nekege turatyn azamattardyń biri sheteldik bolsa, onda birqatar qosymsha qujattar talap etiledi:

• Sheteldikpen neke jalpy talaptar boıynsha tirkeledi, biraq bul qyzmetti eGov arqyly rásimdeýge bolmaıdy.

• Qalyńdyq pen kúıeý jigit mindetti túrde AHAT bólimine kelip, jazbasha ótinish beredi.

• Sonymen qatar sheteldik azamat:

  • Óz eliniń ýákiletti organynan neke qııýǵa qabilettiligi týraly anyqtama (ıaǵnı, qazirgi ýaqytta basqa nekede emes ekenin rastaıtyn qujat);

  • Pasportynyń notarıaldy kýálandyrylǵan kóshirmesin usynýy tıis.

  • Eger buryn nekede bolǵan bolsa, onda sol nekeniń buzylǵanyn nemese toqtatylǵanyn rastaıtyn qujat qajet.

Inesh Maýsenovanyń aıtýynsha, sheteldikter bul anyqtamalardy alý úshin kóbine óz elderine baryp keledi. Degenmen, olardy Qazaqstandaǵy elshilik arqyly da alýǵa bolady, bul – toı kúnin josparlaý kezinde eskerilýi tıis mańyzdy faktor.

Sheteldik azamattardyń anyqtamalarynyń berilý merzimi – olardyń óz eliniń memlekettik organdarymen retteledi.

Aıta keteıik, Qazaqstanda tamyzda 16,9 myńǵa deıin neke qıylady.