Sheteldikter úshin Ózbekstanda ýaqytsha tirkelý quny arzandady

TAShKENT. QazAqparat - Ózbekstanǵa barǵan sheteldik týrıster endi derbes onlaın tirkelýine bolady, dep habarlaıdy «QazAqparat» HAA-nyń menshikti tilshisi.

«Sheteldik týrısterdiń Ózbekstanǵa emin-erkin kirýin qamtamasyz etý maqsatynda ishki ister organdarynda tirkelý protsedýrasy jeńildetildi. Ol úshin, Ózbekstan Mınıstrler kabınetiniń 29 mamyrdaǵy qaýlysyna sáıkes, Internette mamandandyrylǵan elektrondy baǵdarlamanyń kómegimen derbes tirkelýge jaǵdaı jasaldy», - dep málimdedi Memlekettik týrızm komıtetiniń baspasóz qyzmeti.

Jańa tártip boıynsha, Ózbekstanǵa ózdiginen kelgen týrıster úsh kúnniń ishinde Internet arqyly baratyn jerlerin kórsete otyryp, ishki ister organdarynda tirkele alady.

Budan tys, qaýlyǵa sáıkes, memlekettik baj, alym jáne basqa da salyq emes tólemderdi sheteldik valıýtamen qabyldaý tártibi de ózgerdi. Endi sheteldikter jáne azamattyǵy joq tulǵalar 30 kúnge deıin Ózbekstanda bolatyn kúnderiniń ár táýligi úshin eń tómengi jalaqynyń 2% mólsherinde (3445 sým) tóleıdi.

Buǵan deıin týrıster, qansha ýaqytqa tirkelýinen tys, 20 AQSh dollary mólsherinde tóleıtin. Bul ózgeris, sheteldik týrısterdiń qarjysyn únemdeıdi.

Ózgerister TMD elderiniń azamattaryn da aınalyp ótken joq. Buryn, Ózbekstanǵa barǵan TMD azamattarynan 6 aı úshin 5 AQSh dollary (40 129 sým) mólsherinde tólem alynsa, endi 30 kúnniń ár táýligi úshin 3445 sým alynady.