Sheteldik jumys kúshin zańsyz tartqandar jaýapqa tartyldy

ALMATY. QazAqparat - Almatyda «Kelimsek» is-sharasy barysynda sheteldik jumys kúshin zańsyz paıdalanǵan 8 qazaqstandyq jaýapqa tartyldy, dep habarlaıdy QazAqparat tilshisi.

Bul týraly Almaty qalalyq polıtsııa departamenti málim etti.

Almatyda 6 jeltoqsannan bastap qoǵamdyq tártipti saqtaý, sheteldikterdiń Qazaqstanda bolý erejelerin buzý faktilerin anyqtaý maqsatynda «Kelimsek» respýblıkalyq jedel aldyn alý is-sharasy ótip jatyr.

«Іs-sharanyń birinshi kúninde kóshi-qon zańnamasyn buzǵany úshin 306 adam ákimshilik jaýapqa tartyldy, onyń ishinde 234-i Qazaqstan Respýblıkasynda bolý erejelerin buzǵan shetel azamattary. Sot sheshimimen 24 sheteldik elden shyǵaryldy. Sonymen qatar, sheteldikterdiń Qazaqstan Respýblıkasynda bolýynyń zańdylyǵyn qamtamasyz etý sharalaryn qoldanbaǵany úshin 64 qabyldaýshy tarap jaýapqa tartyldy. Sondaı-aq, Qazaqstanda sheteldik jumys kúshin tartý erejelerin buzǵany úshin 8 jumys berýshi jaýapqa tartyldy», – deıdi Almaty qalalyq PD Kóshi-qon qyzmeti basqarmasynyń bastyǵy Ashat Býtýnchınov.