Sheteldik kompanııa Túrkistannyń qurylys salasyna 51 mlrd teńge bóledi

TÚRKІSTAN. QazAqparat - Qytaılyq kompanııanyń Qazaqstandaǵy fılıaly Túrkistan qalasyndaǵy jańa nysandardyń qurylysyna 51 mlrd teńge ınvestıtsııa quıýǵa daıyn. Bul týraly oblys ákimdiginiń baspasóz qyzmetinen málim etti, dep habarlaıdy QazAqparat.

Túrkistan oblysynyń ákimi Janseıit Túımebaev qytaılyq «HENAN PROVINCE INSTALLATION GROUP CO.LTD» JShS-niń Qazaqstandaǵy fılıaly dırektorynyń orynbasary Ma Shıanjoýmen kezdesti. Basqosýda taraptar Túrkistan qalasynda boı kóteretin jańa ǵımarattar jaıyn talqylady. Qonaqtar oblys ortalyǵyndaǵy qurylys nysandarynyń qurylysyna 51 mlrd teńge kóleminde ınvestıtsııa quıyp, birlesken jobalardy júzege asyrýǵa daıyn ekenin jetkizdi.

Óz kezeginde aımaq basshysy ákimshilik iskerlik ortalyǵynan turǵyn keshenin salýdy usyndy. Sondaı-aq, jobanyń josparly túrde iske asýyna memleket tarapynan barynsha qoldaý kórsetiletinin jetkizdi. ıAǵnı, nysandardy salýǵa arnalǵan jer telimderin bólý jáne qujattaryn ázirlep, onda tartylatyn ınfraqurylym máseleleri tolyǵymen ákimdik tarapynan júzege asyrylatyn bolady.

Kezdesý sońynda taraptar tyǵyz kommertsııalyq qatynastardy damytýǵa, ekijaqty ınvestıtsııalar men tehnologııalar transfertiniń kólemin ulǵaıtýǵa, sonyń ishinde Túrkistan oblysynda «Investıtsııalyq jobalardy» júzege asyrýǵa negiz bolatyn memorandýmǵa qol qoıdy.