Sheteldik ınvestorlarmen 4,7 mlrd dollardyń kelisimi jasaldy

ASTANA. QazAqparat - Astanada ótip jatqan Kazakhstan Global Investment Roundtable jahandyq ınvestıtsııalar jónindegi dóńgelek ústel otyrysy aıasynda 4,7 mlrd dollardy quraıtyn 32 kommertsııalyq qujatqa qol qoıyldy. Investıtsııalar el ekonomıkasynyń barlyq salalaryn qamtıtyn joǵary tehnologııalyq jobalarǵa tartylatyn bolady, dep habarlaıdy QazAqparat tilshisi.

Atap aıtqanda, Kazakh Invest pen frantsýzdyq TNK Servier JSC arasynda farmatsevtıkalyq preparattar óndirisi boıynsha jobalardy júzege asyrý jóninde túsinistik memorandýmy rásimdeldi.

Mashına jasaý salasynda Qaraǵandy oblysynyń ákimdigi men Hebei Hua Tong Cable kompanııasy kabel ónimderi óndirisi boıynsha jol kartasyn bekitti.

Al jeńil ónerkásip salasynda Kazakh Invest pen túrkııanyń Cukurova Holding kompanııasy gofrokarton kaptamalaryn shyǵaratyn zaýyt qurylysyn birlesip qolǵa alatyn bolady.

Sonymen qatar taraptar jip pen mata shyǵaratyn zaýyt salýǵa ýaǵdalasty.

Agroónerkásip salasynda da birqatar qujatqa qol qoıyldy. Máselen, Eursian Agro Holding pen avstralııalyq Cedar Meats Australia kompanııasy etti qaıta óńdeıtin zaýyt qurylysyn qolǵa almaq.

Kazakh Invest pen túriktiń Dal Holding kompanııasy bolsa aýmaǵy 200 gektardy quraıtyn jylyjaıdy kókónis saqtaıtyn qoımasymen birge júzege asyrady.

Sonymen qatar Kazakh Invest qytaıdyń Hangzhou Qiandaohu xinLong Sci-tech kompanııamen birge jylyna 12 myń tonna bekire balyǵyn ósirip, óńdeıtin, 2 myń tonna ýyldyryq shyǵaratyn jobany júzege asyratyn bolady.

Munaı-gaz, hımııa salasynda Kazakh Invest pen West Hydrocarbons Commercial Investment kompanııasymen memorandýmǵa qol qoıdy. Qujatqa sáıkes zamanaýı munaı óńdeý zaýyty salynady.

Rıteıl salasynda Kazakh Invest pen frantsýzdyq Decathlon Kazakhstan kompanııasy sporttyq kıimder men qural-jadbyqtardy satýmen aınalysatyn dúkender jelisin quratyn bolady. Sondaı-aq taraptar aldaǵy ýaqytta 4800 jumys ornyn qura otyryp, óndiris oshaǵyn ashýǵa da nıetti.

Munan bólek, Frantsııa, Germanııa, Túrkııa, Polsha, Reseı, Qytaı syndy 13 eldiń transulttyq kompanııalarymen 8 jobany júzege asyrý týraly kelisimge qol qoıyldy.

QR Premer-Mınıstri Baqytjan Saǵyntaevtyń qatysýymen ótip jatqan KGIR-2018 jumysyna álemdik iri kompanııalardyń, otandyq bıznestiń, memleketttik organdardyń 600-den astam ókili qatysýda. Elimizdiń ınvestıtsııalyq damýyn talqylaý úshin elordaǵa Túrkııadan - 60, AQSh-tan - 43, Germanııadan - 37, Ulybrıtanııadan - 60, QHR - 49, Frantsııadan - 28, Reseıden - 30, BAÁ-den 74 ınvestor keldi.