Sheteldik ınvestorlar keńesiniń tıimdiligi qandaı

ASTANA. QazAqparat - Astanada QR Prezıdenti janyndaǵy Sheteldik ınvestorlar keńesiniń 31-shi otyrysy bastaldy. Buǵan deıingi otyrysta biraz tapsyrmalar berildi. QR Investıtsııalar jáne damý mınıstri Jeńis Qasymbek osy ýaqytqa deıin atqarylǵan jumys boıynsha esep berdi, dep habarlaıdy QazAqparat tilshisi.

«Byltyr Sheteldik ınvestorlar keńesiniń 30-shy plenarlyq otyrysy ótken bolatyn. Sol kezde jańa energetıka máselesi qaraldy. Úkimetke 15 naqty tapsyrma berildi. Birinshiden, 2017 jyly 11 shilde kúni elektr energetıkasy máseleleri boıynsha zań qabyldandy. Atalǵan qujatta óndiristik kompanııalarǵa balamaly energııa nysandaryn salýǵa ruqsat berildi. Memleket bolsa, ol energııany satyp alady. Atalǵan jobalar boıynsha bıyl alǵash ret halyqaralyq aýktsıondar ótkizilip otyr. Qazirdiń ózinde respýblıka boıynsha balamaly energııa shyǵaratyn ondaǵan jobalar qolǵa alyndy. Sheteldik ınvestorlar tarapynan úlken qyzyǵýshylyq bar», - dedi J.Qasymbek búgingi 31-shi otyrysta.

Mınıstrdiń aıtýynsha, EKSPO aımaǵynda jasyl tehnologııalar jáne ınvestıtsııalar ortalyǵy ashyldy. Ol da - Sheteldik ınvestorlar keńesinde kóterilgen másele. Atalǵan ortalyq jasyl tehnologııalarǵa qarjy tartatyn bolady.

«Sondaı-aq, buǵan deıingi otyrystyń jumysy boıynsha shetelden jumys kúshin tartý erejelerin jetildirýge qatysty naqty sharalar ázirlendi. Qorshaǵan ortany qorǵaý normalary da qaıta qaraldy. Bunyń barlyǵy Ekologııalyq kodeks pen kóshi-qonnyń jańa zańnamasynda eskeriledi. Budan bólek, ken ıgerý zańnamasynda «gazdy tehnologııalyq jaǵý» degen túsinikke naqty anyqtama berildi. Qazir valıýtalyq retteý jáne salyq salasyna qatysty keńester pysyqtalyp jatyr», - dep atap kórsetti J.Qasymbek.