Sheteldik ınternet-kompanııalardyń qyzmetine «tsıfrlyq salyq» engiziledi

NUR-SULTAN. QazAqparat - 2022 jylǵy 1 qańtardan bastap Salyq kodeksiniń Qazaqstan aýmaǵynda ornalasqan jeke tulǵalarǵa satylǵan taýarlary, kórsetilgen qyzmetteri úshin sheteldik ınternet-kompanııalardyń QQS tóleý jónindegi mindettemeleri týraly normalary kúshine enedi. Bul týraly QazAqparat QR Ulttyq ekonomıka mınıstrliginiń resmı saıtyna silteme jasap habarlaıdy.

Ulttyq ekonomıka mınıstrligi qyzmetteri men taýarlaryn onlaın platformalar arqyly satatyn barlyq sheteldik kompanııalar Qazaqstan bıýdjetine QQS tóleýge mindetti bolatynyn habarlaıdy.

QQS mólsherlemesi satylǵan taýarlar men qyzmetter somasynyń 12%-in quraıdy. Munyń qazaqstandyq salyq tóleýshilerge qatysy joq.

«Tólem tártibi óte qarapaıym. Kompanııalar salyq salý maqsatynda tirkelmeıdi. Ońaılatylǵan tártipte salyq organdaryna hat joldap, QQS tóleýge daıyn ekendigi týraly habarlaıdy», - dedi UEM vıtse-mınıstri Azamat Amrın.

Ákimshilendirý sheteldik ınternet-kompanııalar aýdarǵan somalar týraly ekinshi deńgeıli bankterdiń derekteri negizinde júzege asyrylady.

Ákimshilik maqsattar úshin tólem júıelerin paıdalana otyryp, tólemdi jáne/nemese aqsha aýdarymyn alýshy retinde sheteldik kompanııany sáıkestendiretin belgilerdiń biregeı jıyntyǵy bolyp tabylatyn Merchant ID nemese MID uǵymyn belgileý usynylady.

Merchant ID sheteldik ınternet-kompanııalar beretin rekvızıtterdiń biri bolyp tabylady. Ol boıynsha bankter tıisti tólemder men aqsha aýdarymdaryn sáıkestendiredi.

Bul – halyqaralyq praktıka. Máseleni qarastyrý kezinde halyqaralyq, Eýropa elderiniń de, taıaý kórshilerimiz Reseı men Belarýstiń de tájirıbesi zertteldi.

UEM-niń boljamynsha, osy QQS salyǵy esebinen bıýdjetke jylyna 2 mlrd teńge túsedi.

Eske salsaq, 2021 jylǵy 25 qarashada Senat Salyq kodeksine ınternet arqyly satylatyn taýarlarǵa tsıfrlyq salyq engizýdi qarastyratyn túzetýlerdi qabyldaǵan bolatyn.