Shetelden sanavıatsııamen elge qansha adam jetkizildi

ASTANA. KAZINFORM – Qazaq onkologııa ınstıtýtynyń habarlaýynsha, Qazaqstan postkeńestik keńistikte sanıtarlyq avıatsııa júıesi damyp kele jatqan sanaýly ǵana elderdiń biri, dep málimdedi Shuǵyl medıtsına ulttyq úılestirý ortalyǵynyń basshysy Erjan Ádilbekov.

- Jýyrda ǵana Mysyrǵa arnaıy reıs baryp qaıtty. Ol jaqtan ınsýlt alǵan áıel jetkizildi. Ókinishke qaraı, onkologııalyq aýrýy úshinshi, tórtinshi deńgeıge jetken, ıaǵnı ábden asqynǵan elimizdiń azamattary em alý úshin Koreıa, Túrkııa sııaqty elderge baryp jatady. Olar onda óz aıaǵymen barady da, jaǵdaıy nasharlaǵan soń biz olardy elge alyp kelemiz, - dedi Ádilbekov.

Onyń sózinshe, otandyq onkologııalyq kómek halyqaralyq standarttarǵa saı jáne sheteldikinen esh kem emes.

Aýrýdy tasymaldaý medıtsınalyq kórsetkishter men tehnıkalyq múmkindikterge qaraı júzege asyrylady. Patsıentti elge qaıtarý máselesin árbir jaǵdaıdy bólek baǵalaıtyn arnaıy komıssııa sheshedi.

- Biz barlyǵyn birdeı evakýatsııalaı almaımyz. Patsıenttiń jaǵdaıy sáıkes kelýi tıis naqty talaptar bar,- dep qosty ortalyq jetekshisi.

2025 jyly Qazaqstanǵa shetelderden sanavıatsııamen 5 adam jetkizildi. Ortasha esepen alǵanda jaǵdaıy aýyr 15 naýqasty jetkizýge bolady.

Osyǵan deıin náresteni Óskemennen Rıdderge sanavıatsııamen jetkizgeni týraly jazdyq.