Shetelden ákelingen júk kólikteri tekseriledi
ASTANA. KAZINFORM – Tehnıkalyq reglamentke sáıkes kelmeıtin júk kólikterin elge kirgizbeý úshin tekserý júrgizilip jatyr. Bul týraly Úkimet otyrysynda Qarjy mınıstri Mádı Takıev aıtty.
«Osy jyldyń 10 aıynyń kórsetkishi boıynsha 143 myń kólik quraly resimdeldi, 291,4 mlrd teńge somasynda kedendik tólemder men salyqtar bıýdjetke tústi. Bul rette, 80 paıyzy jeńil avto kólik quralyna tıesili boldy. Tehnıkalyq reglamentke sáıkes kelmeıtin júk avtokólik quraldaryn tasymaldaýdy boldyrmaý maqsatynda Qarjy mınıstrliginiń Memlekettik kirister komıteti men Saýda jáne ıntegratsııa mınıstrliginiń Tehnıkalyq retteý jáne metrologııa komıtetimen birlesken tıisti buıryǵy ázirlenip, qabyldandy. Osy buıryq aıasynda akkredıttelgen uıymdardy tarta otyryp, Saýda jáne ıntegratsııa mınıstrliginiń atalǵan komıtetiniń aýmaqtyq organdarynyń qyzmetkerlerimen birlesken kedendik tekserýler júrgizilýde», - dedi mınıstr.
Onyń atap ótýinshe, 2024 jylǵy 1 qarashada táýekel beıini 1 532 kedendik deklaratsııa boıynsha iske qosyldy. 2 577 júk avtokólik quralyna qatysty birlesken kedendik tekserý júrgizildi. Nátıjesinde tehnıkalyq reglamentti buzýdyń 99 faktisi anyqtaldy. 33 ákimshilik jáne 2 qylmystyq is qozǵaldy.
«Aıta ketý kerek, ruqsat berý qujattarynyń sáıkessizdigi anyqtalǵan kezde mınıstrlik josyqsyz synaq zerthanalary men sáıkestikti rastaý jónindegi organdarǵa qatysty sharalar qabyldaý úshin ýákiletti organǵa aqparat jiberetin bolady. Sondaı-aq, formatty-logıkalyq baqylaý, tek maquldanǵan kólik quraldarynyń túrlerinde kórsetilgen zańdy tulǵalarǵa ǵana kólik quralynyń tıpin maquldaý múmkindigi belgilendi», - dedi ol.
