Sherzat isi sotqa qashan joldanady

ASTANA. KAZINFORM — QR Bas prokýrorynyń orynbasary Áset Shyndalıev Sherzat Polattyń ólimine qatysty isti sotqa joldaý tártibine túsinik berdi.

Onyń aıtýynsha, tergeý aıaqtalyp, is zerdeleý jáne aıyptaý aktisin jasaý úshin prokýratýraǵa joldandy. Qazir Almaty oblysynyń prokýratýrasy júrgizilgen tergeý amaldarynyń zańdylyǵyn tekserip jatyr. Onyń qorytyndysy boıynsha isti sotqa jiberý týraly sheshim qabyldanady.

— Ázirge, sotqa joldanatyn naqty kúnin ataı almaımyn. Óıtkeni zań boıynsha mundaı sheshimder ádette 10 kún ishinde qabyldanady. Biraq ister kúrdeli bolsa, prokýrordyń mundaı sheshimdi bir aı ishinde qabyldaýǵa múmkindigi bar, — dedi Bas prokýrordyń orynbasary Senatta tilshiler suraǵyna jaýap bere otyryp.

Sonymen qatar ol kúdiktilerdiń sany ózgerissiz qalǵanyn naqtylady, osyǵan deıin jarııalanǵan 11 adam bar.

Eske salaıyq, byltyr 4 qazan kúni tóbelesten 16 jasar jasópirim qaıtys bolǵanyn jazǵanbyz.

15 qazan kúni Talǵar qalasynyń ákimi Bahyt Qýatbekuly Kúrishbekov, Talǵar qalasy ákiminiń orynbasary Matan Saǵyndyq óz mindetterin tıisti deńgeıde atqarmaǵany úshin laýazymdarynan bosatyldy. Artynsha, Talǵar aýdany ákimi apparatynyń basshysy Aslan Qasymbaev qyzmetinen qýyldy. 

Keıin Azat aýylynda jerleý rásimin ótkizý kezinde qoǵamdyq tártipti buzǵany úshin Sherzat Polattyń ákesi Qarjaýbaı ustalǵanyn jazǵanbyz. 

Bıyl aqpan aıynyń aıaǵynda Sherzat isine qatysty qylmysty tergeý aıaqtalǵany jarııalandy.