Sherhan shyndyqtyń shyraqshysy, aqıqattyń aldaspany edi - Ulyqbek Esdáýlet
Qaraly jıynǵa jınalǵan qaýym Sherhan Murtazamen birge qyzmet istegen, dos bolyp qatar júrgen kezderden estelikter aıtty.
Aqyn, QR Jazýshylar odaǵy basqarmasynyń tóraǵasy Ulyqbek Esdáýlet Sheraǵanyń qazasyn asaý tolqynnyń tynshýymen salystyrdy.
«Sum ajal Alashtyń aıaýly perzenti, abyz aqsaqal, qazaq ádebıetiniń qaıtalanbas qaıratkeri, qazaqtyń uly qalamgeri Sherhan Murtazany ortamyzdan alyp ketti. Qazaq ádebıetiniń kórnekti ókili, jazýshy, aqıqattyń aldaspany, shyndyqtyń shyraqshysy atanǵan QR memlekettik syılyǵynyń laýreaty Sherhan Murtaza 87 jasqa qaraǵan shaǵynda dúnıeden ótti. Alyp júrek toqtady, asaý tolqyn tynshydy. Qazaqtyń júregi qan jylap, teńselip tur. Sheraǵa óz ǵumyryn tutastaı jurtyna arnady. Shyryldaǵan shyndyq úshin janyn shúberekke túıip turyp shaıqasty. Aqıqat úshin arystandaı arpalysty. «Aıyr til jylanda ǵana bolady, al adamnyń tili - bireý ǵana» dep týǵan tilimizdiń mártebesi úshin kúresti. Jerdi satý - anany satýmen teń dep, týǵan jeriniń tutastyǵy úshin tartysty. «Rýhy men namysy sóngen el - ólgen el» dep urpaqtyń rýhyn oıatty. «Táýelsizdiktiń dámi tátti, joly qatty» dep egemendigimizdi bekitýge bel býyp kiristi. «Elbasy bireý, qalǵanymyz tireý bolýymyz kerek» dep elimizdiń bolashaǵy úshin kókbaıraqtyń astynda tize qosyp birigýimiz kerektigin qadap aıtty. Aqıqattyń aldaspany, shyndyqtyń shyraqshysy bolǵan qalamgerdiń ólmes shyǵarmalary urpaqqa mıras bolyp qaldy. Kúndeı kúrkiregen kúsh-qýaty, muqalmaǵan jigeri, arqyraǵan aıbary, naızaǵaıdaı jarqyldaǵan namysy qaldy», - dedi aqyn.
Ulyqbek Esdáýlet Sherhan Murtazanyń jýrnalıstik joly týraly da aıtyp ótti.
«Sheraǵa elimizdiń baspasózi men aqparat salasyn bıikke shyǵarý úshin jan aıamaı atsalysty. «Juldyz» jýranlynda, «Lenınshil jas» «Qazaq ádebıeti», «Egemen Qazaqstan» gazetterinde bas redaktor, QR memlekettik teleradıo kompanııasynyń tóraǵasy bolǵan kezinde de órimdeı, talantty jastardy janyna jınap, tálim bere bildi. Ulaǵatty qalamger ǵana emes, uly ustaz atandy. Bul shákirtteriniń bári keıin qazaqtyń birtýar azamattaryna aınalǵanda, ózderin «Sherhannyń shekpeninen shyqqanbyz» dep maqtana alatyn halge jetti», - dedi U.Esdáýlet.
Aıta ketý kerek, Qazaqstannyń belgili jazýshysy, qoǵam qaıratkeri Sherhan Murtaza 86 jasyna qaraǵan shaǵynda 9-qazanda shamamen 18:30-da Almaty qalasyndaǵy úıinde aýyr naýqastan qaıtys bolǵan edi.
