Şerbakov bógetiniń buzylýy: Aqtóbede qylmystyq is toqtatyldy

AQTÓBE. KAZINFORM – Áıteke bı aýdanyndaǵy Şerbakov bógeti byltyr kóktemde buzylyp, is qozǵaldy. Tergeý júrgenimen, QR Sybaılas jemqorlyqqa qarsy is-qımyl agenttiginiń oblystyq departamenti isti toqtatty.

Byltyr Şerbakov bógeti buzylyp, Áıteke bı aýdanynda jergilikti deńgeıde tótenshe jaǵdaı jarııalandy. Arada bir jyl ýaqyt ótkenimen, munda áli kúnge deıin tótenshe jaǵdaı rejımi saqtalǵan. Sebebi saldaryn túgel joımaı, alynbaıdy.

- QR Sybaılas jemqorlyqqa qarsy is-qımyl agenttiginiń oblystyq departamenti Qylmystyq kodekstiń «Salǵyrttyq» baby boıynsha sotqa deıingi tergeý jumysyn júrgizdi. Sot aldy tergeýden soń qylmystyq is toqtatyldy, - dep habarlady Aqtóbe oblysy prokýratýrasynyń baspasóz qyzmeti.

Aqtóbe oblysy ákimi baspasóz qyzmetiniń habarlaýynsha, Şerbakov bógetin buǵan deıin jóndegen merdiger qalpyna keltiredi.

Eske salsaq, byltyr sý tasqyny kezinde Aqtóbede kommýnaldyq menshiktegi 15 bóget buzyldy. Úsheýiniń kepildik merzimi bar. Tizimde dál osy Şerbakov bógeti boldy. Bóget 2023 jyly jóndeldi. Oǵan 200 mln teńgeden astam qarjy bólingen.

Aqtóbe oblysynyń ákimi Ashat Shaharov Áıteke bı aýdanyna jumys saparymen baryp, rezervtik syıymdylyqtyń kólemin ulǵaıtýdy, sý aıdynynyń aınalasyna jańa shlıýzder men sý beketterin ornatýdy, sondaı-aq túbin tazartý men tereńdetýdi eskere otyryp, qaıta joba ázirleýdi tapsyrdy.