«Sheneýnikter bosańsymaýy tıis» - baspasózge sholý
«Memleket basshysy Nursultan Nazarbaev S.Seıfýllın atyndaǵy Qazaq agrotehnıkalyq ýnıversıtetiniń rektory Aqylbek Kúrishbaevty qabyldady», - dep jazady «Egemen Qazaqstan» gazeti senbilik sanyndaǵy «Salany damytý úshin salıqaly is-qımyl qajet» degen taqyryptaǵy maqalasynda. Basylymnyń jazýynsha, kezdesý barysynda otandyq agrarlyq ǵylymnyń jaı-kúıi, sondaı-aq, ony odan ári damytýdyń ózekti máseleleri talqylandy. A.Kúrishbaev ýnıversıtettiń sońǵy jyldary qol jetkizgen jetistikteri jáne joǵary oqý orny arqaýynda halyqaralyq agrarlyq zertteý ýnıversıtetin qurý jónindegi Memleket basshysy tapsyrmasynyń iske asyrylýy týraly baıandady. Nursultan Nazarbaev Qazaqstanda jetkilikti kólemde jer jáne adam resýrstary bar ekenine qaramastan, elimizde aýyl sharýashylyǵy salasy tıisti qarqynda damymaı otyrǵanyn aıtty. «Biz aýa raıy qolaıly, jaýyn-shashyn qajetti mólsherde bolǵanda ǵana mol astyq jınaımyz. Árıne, aýyl sharýashylyǵynda ónimdilik burynǵy jyldarmen salystyrǵanda aıtarlyqtaı artty, biraq áli de bul baǵytta belsene jumys júrgizý mindeti tur. Memleket osy mindettiń oryndalýyna edáýir resýrstar bólýde», - dedi Qazaqstan Prezıdenti.
Osy kúnderi Sochıde ótip jatqan qysqy Paralımpıada oıyndaryna oraı «Egemen Qazaqstan» gazetinde «Paralımpıada: júlde aýyly kóriner emes» degen taqyryppen maqala basyldy. Basylymnyń jazýynsha, atalǵan baıraqty básekede Qazaqstannan bes sportshy qatysýda. Jalpy, Sochı Paralımpıadasynda álemniń 45 eliniń 1650 múgedek sportshysy slej-hokkeı, kerlıng, shańǵy jarysy, bıatlon, taý shańǵysynan 72 medal jıyntyǵyn sarapqa salýda. Qazaqstan Paralımpıada komıtetiniń derekterine qaraǵanda, bizdiń sportshylar Sochı synyna joldamany Kanada, Fınlıandııa, Germanııada ótken irikteý jarystarynda jeńip alǵan. «Jalpy, elimiz sportshylary osy kezge deıin bes qysqy Paralımpıadaǵa qatysqanymen, birde-bir medal almaǵan eken. Osyǵan baılanysty bizdiń memleketimiz Sochı Paralımpıadasynda altyn medal alǵan sportshyǵa 50 000, kúmis alǵan otandasymyzǵa 35 000, qola alǵan sportshyǵa 25 000 AQSh dollary kóleminde syıaqy taǵaıyndady», - dep jazady basylym. «Aıqyn» gazetiniń búgingi sanynda Qazaq memlekettik qyzdar pedagogıkalyq ýnıversıteti Ekologııa kafedrasynyń professory, bıologııa ǵylymdarynyń doktory Kelis Jaılybaımen aradaǵy suhbat «Bizdiń maqsatymyz - Elbasynyń «jasyl beldeý» ıdeıasyn jastar arqyly júzege asyrý» degen taqyryppen berildi. «Qorshaǵan ortany qorǵaý mınıstri Nurlan Qapparovtyń Parlament májilisinde Úkimet saǵatynda jasaǵan málimdemesi boıynsha, «ǵalamdyq jylyný» protsesi Qazaqstanda jyldamyraq júrýde. Atalǵan protsestiń saldarynan Antarktıdadaǵy, Grenlandııadaǵy, bıik taýlar basyndaǵy muzdyqtar 2001-2003 jyldardan bastap 3-4 ese jyldamdyqpen erýde. Nátıjesinde álemdik muhıt 7-9 metrge jáne odan da joǵary deńgeıge kóteriledi degen boljam bar. ıAǵnı teńiz jaǵalaýyndaǵy kóptegen qalalar, eldi mekender sý astynda qalýy múmkin. Al qurylyq ortasyndaǵy jerlerde, mysaly, Qazaqstanda jaýyn-shashyn mólsheri kúrt azaıyp, óte kúshti qýańshylyq jaǵdaı qalyptasyp, tuşy sý problemasy týyndaýy yqtımal», - deıdi. Sondaı-aq ǵalym Grenlandııadaǵy, Antarktıdadaǵy, bıik taýlar basyndaǵy muzdyqtar jyldam erigendikten joǵaryda atalǵan 40-45 jyldyń ádepki 15-25 jyly ishinde kóktem, jaz aılarynda jaýyn, al kys aılarynda qar kóp jaýyp, tasqyn sý problemalary týyndaıtyndyǵyn alǵa tartady. Onyń sózine qaraǵanda, keıingi 2-3 jyl ishinde mundaı jaǵdaılar Eýropada, Avstralııada, Qytaıda, Indııada, Japonııada, Reseıde, Tynyq muhıt araldarynda jáne Qazaqstanda kys kezindegi qar kóp mólsherde jaýǵandyqtan, kóktemdegi, jazdaǵy nóser jańbyr áserinen kóptegen eldi mekenderdi tasqyn sý basty.
Bıleýshi partııa qazirgi kezde halyqty shyn máninde ne tolǵandyratynyn anyqtapty. Ol máselelerdiń tizimi keshe jarııa etildi. Osy kúni «Nur Otan» partııasynyń Ortalyq apparatynda memlekettik organdardyń qyzmetine pármendi qoǵamdyq baqylaý ornatý máselelerine arnalǵan keńes ótti. Bul jaıtqa maqala arnaǵan «Aıqyn» gazetiniń jazýynsha, óıtkeni sheneýnikterdiń, tipti Elbasy tapsyrmalaryn oryndaýǵa da nemquraıly qaraıtyndyǵy málim bolýda. «Osy oraıda «Nur Otannyń» hatshysy Eldar Syzdyqov Prezıdent, partııa Tóraǵasy Nursultan Nazarbaevtyń memorgandar jumysyna baqylaýdy kúsheıtý týraly tapsyrma bergenin qadap aıtty», - dep jazady basylym. Maqala ózegine qaraǵanda, Kóshbasshy partııa jurtshylyqtan alystap ketpegeni, qaıta aralas-quralas júrgeni abzal. Sondyqtan «Nur Otan» áleýmettik saýalnamalar men táýelsiz zertteýler júrgizý jáne qoǵamdyq qabyldaýlaryna keletin azamattardyń aryz-shaǵymdaryna taldaý jasaý arqyly el tirshiliginiń «tamyryn basyp», qazaqstandyqtardyń áleýmettik hal-jaǵdaıyn baǵamdap otyr eken. Jarııalanym «Sheneýnikter bosańsymaýy tıis» degen taqyryppen berilgen. «Ortalyq kommýnıkatsııalar qyzmetinde ótken brıfıngte Astanaǵa jumys saparymen kelgen Halyqaralyq kórme bıýrosynyń Bas hatshysy Vısente Lossertales elimizdiń «EKSPO-2017»-ge daıyndyq jumystaryna rızashylyǵyn bildirip, osy qarqyn báseńdemese, Qazaq eli úlken jetistikterge jetetinin málimdedi»,- dep jazady «Astana aqshamy» gazeti senbilik sanyndaǵy «Alǵashqy qada sáýirde qaǵylady» degen taqyryptaǵy maqalasynda. Basylymnyń jazýynsha, «EKSPO» mamandandyrylǵan kórmesin ótkizý arqyly qazaq eli óziniń ult retindegi ereksheligi men qol jetkizgen tabystaryn álem aldynda aıshyqtaýǵa úlken múmkindik alyp otyrǵandyǵyn aıtqan Lossertales myrza bul aıtýly shara memlekettik áleýmettik-ekonomıkalyq ahýalyna oń áser etetinin jetkizgen.
