Shekarashylar esirtki ótkizbek bolǵandardy ustady
ASTANA. QazAqparat - Ótken demalys kúnderi shekarashylar memlekettik shekara arqyly esirtki ótkizbek bolǵan birneshe derek tirkedi, dep habarlady QR UQK baspasóz qyzmetinen.
Elimizdiń shyǵysyndaǵy «Aýyl-avto» shekaralyq baqylaý-ótkizý beketiniń baqylaýshylary «Óskemen-Novosıbırsk» baǵytynda kele jatqan «KIA-Granbırd» jolaýshylar avtobýsyn tekserý kezinde Qazaqstan Respýblıkasynyń azamatyn ustady. 25 jas shamasyndaǵy otandasymyzdyń qaltasynan eki qutyǵa salynǵan psıhotropty esirtkilik zat - taren tabyldy. Shekara qyzmetiniń «Soltústik» óńirlik basqarmasyna qarasty «Shemonaıha - temirjol» baqylaý-ótkizý beketiniń baqylaýshylary «Rıdder -Astana» baǵytynda kele jatqan jolaýshylar poıyzyn tekserý kezinde 27 jastaǵy Qazaqstan azamatyn ustady. «Lora» esimdi qyzmettik ıttiń kómegimen №8 vagondy qaraý kezinde bir kýpeniń joǵarǵy sóresindegi sporttyq bas kıimniń ishine jasyrylǵan salmaǵy 90 gramm bolatyn esirtkilik zat «marıhýana» tabyldy. Atalǵan derekter boıynsha quqyqqorǵaý organdary habarlandyryldy. Tergeý amaldary júrgizilýde.
