Shekara mańyndaǵy 100-ge jýyq mektepte ınternet sapasy nashar

ASTANA. KAZINFORM — Qazaqstan mektepteriniń 85 paıyzy joǵary jyldamdyqty, sapaly ınternetpen qamtylǵan. Bul týraly Oqý-aǵartý mınıstri Ǵanı Beısembaev Úkimettegi brıfıngte aıtty.

Mınıstrdiń aıtýynsha, shekara mańyndaǵy mektepterdi ǵalamtormen qamtýda másele týyndaǵan.

 — Joǵary jyldamdyqty degenimiz keminde 20 megasekýnd, óıtkeni buǵan deıingi kórsetkish 4,8 edi. Onyń ishinde shalǵaıdaǵy 94 aýylda jyldam, sapaly ınternetti qamtamasyz etý múmkin bolmaı otyr. Ol másele Tsıfrlyq damý mınıstrligimen birge sheshilip jatyr. Onyń basty sebebi — 94 aýyl mektebi shekara mańynda ornalasqan. Ol jerge Starlink jetkizip kórdik, biraq shekarada ornalasqandyqtan onyń jumysyna kedergiler bar ekenin kórdik. Sondyqtan máseleni basqa jolmen sheshý qarastyrylyp jatyr, — dedi Ǵ. Beısembaev.

Deı turǵanymen, osy jumys barysynda taǵy da 136 aýyl mektebiniń máselesi talshyqty-optıkalyq jeli tartý arqyly sheshilip jatyr.

 — Bul jumystar bizdegi barlyq mektepterdi joǵary sapaly ınternetpen qamtamasyz etý úshin júrip jatyr, — dedi mınıstr.

Aıta keteıik, aýyldyq aýmaqtardy damytý tujyrymdamasy sheńberinde 2027 jylǵa deıin 180-ge jýyq mektep salý josparlanǵan. Bıyl «Jaıly mektep» ulttyq jobasyn qosa alǵanda, aýyldarda 42 mektep paıdalanýǵa berildi.

Elimizdegi 8 myńǵa jýyq mekteptiń 67% nemese 5247-si — aýyl mektebi. Oqýshylardyń 40% aýyl mektebinde bilim alady.

Sondaı-aq, elimizde úsh aýysymdy, apatty mektepterdiń basym bóligi aýyldarda baıqalyp otyr.