Sharýalarǵa jańa tehnologııalardy úıretý kerek - Nursultan Nazarbaev
Bul týraly Memleket basshysy Nursultan Nazarbaev halyqqa arnalǵan Joldaýynda málimdedi.
2022 jylǵa qaraı eńbek ónimdiligin ulǵaıtyp, óńdelgen aýyl sharýashylyǵy ónimderiniń eksportyn 2,5 esege arttyrý kerek. Memlekettik qoldaýdyń barlyq sharalaryn zamanaýı agrotehnologııalardy tartýǵa baǵyttaý kerek.
«Men arnaıy Qazaqstanda bar tájirıbelerdi qaradym. «Bórte-Mılka» JShS robottandyrylǵan júıeler men ózge de ınnovatsııalardy engizý arqyly sút óndirisin 2 esege kóbeıtken. «Atameken-Agro» tehnologııalardy jetildirý, óndiristi avtomattandyrý jolymen 5 jylda astyq túsimin 2,7 esege arttyrǵan. Bıylǵy túsim 13 protsentke artty. Buǵan deıin bir gektardan 32 tsentner ónim alyp kórmegenbiz. Munyń barlyǵy ǵaryshta emes, Qazaqstanda bolyp jatyr. «Baıserke-Agro» bárimizge tanys.Temirhan Dosmuhambetov tamshylatyp sýraý ádisimen júgeri túsimin 3-4 esege kóbeıtti. Ol zeınetke ketken akademıkterdi shaqyrdy, olardyń bilimin paıdalandy. Mundaı kásiporyndar jetkilikti»,- dep atap ótti Prezıdent.
Sonymen birge, Elbasy Sıngapýrdyń sheteldik mamandardy shaqyrý tájirıbesin mysal retinde keltirdi.
«Soltústik Qazaqstanda «Zenchenko» sharýa qojalyǵy jemis-jıdekten bastap, qarbyzǵa deıin ósirip otyr. Bizdiń jerimiz jetedi, mamandarymyz jetedi. Bárin jasaıtyn múmkindigimiz bar. Yńǵaıly standartty engizip, aýyl sharýashylyǵy salasyndaǵy sheteldik mamandardy shaqyrý qajet. Bir kezderi Sıngapýr japondyq zeınetkerlerdi ózderine shaqyryp, olardyń bilimin paıdalanǵan. Qazir bári qoljetimdi, Internet bar, mamandardy shaqyryńdar, aqshasyn tóleńder. Aýyl sharýashylyǵy mamandaryn jańa tehnologııalar boıynsha jappaı oqytý kerek. Osy maqsatta jáne ǵylymǵa jyl saıyn 100 mlrd teńgeden kem emes qarjy qarastyrýdy Úkimetke tapsyramyn», - dedi Nazarbaev.
Aıta keteıik, Memleket basshysy Nursultan Nazarbaev halyqqa arnalǵan Joldaýyn jyl saıyn jarııalaıdy. Bıylǵy Joldaý elimizdiń áleýmettik-ekonomıkalyq damýynyń ózekti máselelerine jáne qazaqstandyqtardyń ál-aýqatyn odan ári arttyrý mindetterine arnalǵan.
