Sharýalarǵa mobıldi astyq keptirgishterdi lızıngke alý múmkindigi usynyldy
ASTANA. KAZINFORM — «QazAgroQarjy» AQ «Agrolızıng» baǵdarlamasy aıasynda qazaqstandyq sharýalarǵa arnalǵan mobıldi astyq keptirgishterdi satyp alýdy qarjylandyratynyn habarlady, dep habarlaıdy AShM baspasóz qyzmeti.
Astyq keptirýge arnalǵan zamanaýı jabdyqty jyldyq 12,6% mólsherlememen lızıngke alý múmkindigi qarastyrylǵan.
Baǵdarlama sheńberinde ornatý jáne paıdalaný kezinde kúrdeli qurylys-montaj jumystaryn talap etpeıtin astyq keptirgishter qarjylandyrylady. Bul sharýalarǵa tehnıkany qosymsha qurylys jumystarynsyz paıdalanyp, ony qysqa merzimde iske qosýǵa múmkindik beredi.
Mobıldi astyq keptirgishter shaǵyn jáne orta sharýashylyqtar úshin tıimdi tehnologııalyq sheshim bolyp sanalady. Bul tehnıka ártúrli daqyldardy sapaly keptirýdi qamtamasyz etip, ónim shyǵynyn azaıtýǵa ári onyń sapasyn saqtaýǵa múmkindik beredi. Paıdalanýdyń qarapaıymdylyǵy, iske qosý-baptaý jáne montaj jumystarynyń talap etilmeýi mobıldi astyq keptirgishterdi qoldanýǵa qolaıly etedi.
Astyq keptirý qýattaryn jańartý baǵytynda sharýalardy qoldaý damý ınstıtýttarynyń biryńǵaı ekojúıesi aıasynda júzege asyrylady.
— «Agrolızıng» baǵdarlamasy agrarlyq sektordy qoldaýdyń negizgi quraldarynyń biri esepteledi. Baǵdarlama sharýalarǵa eleýli bastapqy shyǵyndarsyz zamanaýı tehnıka men jabdyqqa qol jetkizýge múmkindik berip, qarjylyq júktemeni uzaq merzimge bólýge jaǵdaı jasaıdy. Baǵdarlama sharttaryna sáıkes lızıng avanstyq tólemmen beriledi, onyń mólsheri lızıng nysany qunynyń 15%-ynan bastalady, al tólem merzimi 7 jylǵa deıin belgilengen. Usynylyp otyrǵan lızıng sharttary sharýalardyń naqty qajettilikterine baǵyttalyp, agroónerkásiptik keshendi kezeń-kezeńimen jańǵyrtýǵa arnalǵan, — delingen habarlamada.
Mobıldi astyq keptirgishterdi lızıngke alý jónindegi ótinimder «QazAgroQarjy» AQ-nyń óńirlik fılıaldarynda qabyldanady.
Budan buryn Úkimet jumys istep turǵan sharýa qojalyqtardyń jerin lızıngke satý usynysyn qoldamady.