Sharýalarǵa Kepildik berý qory qurylýy múmkin

ASTANA. QazAqparat – QR Aýyl sharýashylyǵy mınıstri Erbol Qarashókeev Úkimet otyrysynda aýyl sharýashylyǵyn sýbsıdııalaý júıesi qalaı reformalanatynyn aıtty, dep habarlaıdy QazAqparat tilshisi.

«Sýbsıdııalaý júıesin reformalaý aıasynda aýyl sharýashylyǵy taýaryn óndirýshilerdiń ishki naryqqa, sonyń ishinde otandyq qaıta óńdeý kásiporyndaryna shıkizatty jetkizý boıynsha qarsy mindettemelerdi qabyldaý kózdelgen», - dedi mınıstr.

Sondaı-aq, ol «astyq qolhaty» tetigi qalaı engiziletini týraly josparyn bólisti.

«Memleket basshysynyń astyq qolhattary ınstıtýtyn damytý jónindegi tapsyrmasyn oryndaý sheńberinde qoldanystaǵy zańnamaǵa astyq qolhatyn kredıt alý úshin kepilzat retinde taný bóliginde ózgerister men tolyqtyrýlar engizý jumystary júrgiziledi. Sondaı-aq belgilengen lımıt sheginde júz paıyz kepildik beriletin ekinshi deńgeıdegi bankterde ornalastyrylǵan depozıtterge mindetti kepildik berýge uqsas memleket deńgeıinde arnaıy Kepildik berý qoryn qurý múmkindigi qaralady», - dedi vedomstvo basshysy.