«Shardara-Arys» avtojoly paıdalanýǵa berildi

TÚRKІSTAN. QazAqparat - El Táýelsizdiginiń 30 jyldyǵy merekesi qarsańynda Túrkistan oblysynda «Shardara-Arys» avtojoly paıdalanýǵa berildi. Jóndeý jumystary men oǵan qoldanylǵan qurylys materıaldarynyń sapasy tapsyrysshy, avtorlyq, tehnıkalyq qadaǵalaýshy mekemeler men «Ulttyq jol aktıvteri sapasy ortalyǵy» RMK Túrkistan oblysy fılıalynyń tarapynan baqylandy, dep habarlaıdy QazAqparat tilshisi.

Túrkistan qalasy oblys ortalyǵy mártebesin alǵannan bastap óńirdiń jolaýshylar kóligi jáne avtomobıl joldary basqarmasynyń tapsyrysymen jalpy uzyndyǵy 252,6 shaqyrymdy quraıtyn Jetisaı-Shardara-Arys-Ordabasy aýdandary arqyly ótetin jol kezeń-kezeńimen jóndeýden ótkizilýde.

2019-2021 jyldary joldyń 70-111 shaqyrym (Qazaqstan-Dostyq eldi mekenderi) aralyǵyna (41 shaqyrym) merdiger mekeme «Dorstroı» JShS-i tarapynan kúrdeli jóndeý jumystary iske asyrylyp, aǵymdaǵy jyldyń qarasha aıynda paıdalanýǵa berildi. Jóndeý jumystary barysynda 41 shaqyrym joldyń negizi jáne asfalt jabyny jańartyldy.

Odan bólek, jol boıyndaǵy 7 kópir kúrdeli jóndeýden ótkizilip, jańadan sý ótkizgish qubyrlar ornatyldy. Sonymen qatar, jaıaý júrginshilerdiń qaýipsizdigin qamtamasyz etý maqsatynda jasandy jol kedergileri ornatyldy. Jalpy 450 dana jańa jol belgileri qoıyldy. Sondaı-aq, eldi mekenderdiń ishine aıaqjol salynyp, dıodty jaryqtandyrý shamdary jáne zamanaýı úlgidegi aıaldamalar ornatyldy.