«Shańyraq» baǵdarlamasy aıasynda qaıtalama naryqtan baspana satyp alýǵa bola ma – Úkimet jaýaby
«Ulttyq bankpen áleýmettik turǵyn úı salý jáne «Shańyraq» baǵdarlamasynyń sharttary boıynsha kezekte turǵan adamdarǵa «Otbasy bank» AQ arqyly kredıt berý úshin 390 mlrd teńge bólindi. Jańa qurylystarda turǵyn úı satyp alý quqyǵymen jobany iske asyrý qurylys kompanııalarynyń kásipkerlik belsendiligin arttyrýǵa, ekonomıkanyń ósýin jáne halyqtyń jumyspen qamtylýyn qamtamasyz etýge múmkindik berdi», - dedi Asqar Mamın.
Úkimet basshysynyń dereginshe, 2020 jyldyń qorytyndysy boıynsha qurylys ekonomıka salalary arasynda jetekshi orynǵa ıe boldy. Respýblıka boıynsha qurylys jumystarynyń kólemi 4,9 trln teńgege jetti. Bul 2019 jyldan 11,2 paıyzǵa artyq. Barlyǵy 15,3 mln sharshy metr jańa turǵyn úı (140 myń turǵyn úı) salyndy nemese ótken jyldyń deńgeıinen 16,8 paıyzǵa artty.
«2021 jyly búkil el boıynsha turǵyn úıdi paıdalanýǵa berý jospary 17 mln sharshy metr turǵyn úıdi quraıdy. Turǵyn úı qurylysyna ınvestıtsııalar 2019 jylmen salystyrǵanda 33,6 paıyzǵa ósip, shamamen 2 trln teńge boldy. Memlekettik qarajattyń 1 teńgesine 5 teńge jeke ınvestıtsııalar tartylýda. Qabyldanǵan sharalar otandyq óndiris ónimderine suranysty qamtamasyz ete otyryp, qurylys ındýstrııasyn damytýǵa mýltıplıkatıvtik áser etti. Osylaısha, otandyq kásiporyndar shamamen 667 mlrd teńge somasyna qurylys materıaldaryn óndirdi»,- dedi Premer-Mınıstr.
Osyǵan baılanysty ol Turǵyn úı-kommýnaldyq damýdyń 2020-2025 jyldarǵa arnalǵan «Nurly jer» memlekettik baǵdarlamasynyń (onyń ishinde «Shańyraq» kishi baǵdarlamasynyń) mańyzdy mindetteriniń biri turǵyn úı qurylysyn damytýdy qoldaý bolyp sanalatyndyǵyn basa aıtady.
«Qaıtalama naryqta «Shańyraq» baǵdarlamasy aıasynda turǵyn úı satyp alý múmkindigin berý osy sektordaǵy turǵyn úı baǵasynyń ósýine túrtki bolýy múmkin. Joǵaryda baıandalǵandy eskere otyryp, aǵymdaǵy jaǵdaılarda «Shańyraq» baǵdarlamasy sheńberinde turǵyn úıdi bastapqy naryqta ǵana ótkizýdi jalǵastyrǵan oryndy dep sanaımyn. Jalpy, azamattardy turǵyn úımen qamtamasyz etý máseleleri Úkimettiń turaqty baqylaýynda», - dedi Asqar Mamın.
