«Shańyraq kúni» Qasteev murajaıynda ekskýrsııa ótti
ALMATY. KAZINFORM – 17 naýryzda Qazaqstanda Naýryz merekesiniń tórtinshi kúni toılanyp jatyr. Shańyraq kúni - qazaqstandyqtar úshin mańyzdy sanalatyn otbasy qundylyqtaryna arnalǵan. Mereke qurmetine oraı Almatydaǵy Á.Qasteev atyndaǵy murajaıda ekskýrsııa ótti. Іs-sharaǵa «Arystan» mamandandyrylǵan lıtseıiniń oqýshylary qatysty. Olar murajaı qyzmetkerlerin muqııat tyńdady.
Ekspozıtsııada shańyraqtyń ózi, XIX jáne HH ǵasyrlardaǵy óner týyndylary, sondaı-aq qazirgi zamanǵy sýretshilerdiń, qolónershilerdiń eńbekteri usynyldy.
«Naýryznamanyń onkúndigi aıasynda búgin ekskýrsııa otbasylyq qundylyqtar kúnine arnalǵan. Qoldanbaly óner Qazaqstan halqynyń dástúrleri men mádenı murasyn beıneleıdi. Bizdiń jastar men bolashaq urpaq shańyraqtyń ne ekenin bilýi kerek. Kórme aıasynda onnan astam gobelen, ulttyq stıldegi zergerlik buıymdar, kıiz, bylǵary buıymdar, keste tigý, toqý, aǵashtan jasalǵan buıymdar usynylǵan», - dedi murajaı pedagogıkasy jáne ekskýrsııa bıýrosynyń jetekshisi Gúlnar Jývanııazova.
Іs-shara barysynda murajaı qyzmetkerleri kıiz úıdiń negizgi bólikteriniń biri – shańyraq týraly qyzyqty aqparattarmen bólisti, sondaı-aq ulttyq óner buıymdaryn jasaý dástúrleri men tehnologııalary týraly egjeı-tegjeıli aıtyp berdi.
«Shańyraq – bizdiń tiregimiz. Jalpy kıiz úı – bul ejelgi dáýirden kele jatqan kóshpendilerdiń dúnıetanymy. Shańyraq kıeli maǵynaǵa ıe, sheksizdikti, máńgilikti beıneleıdi, ol túrki halyqtary úshin kıiz úıdiń syndarly elementi ǵana emes, sonymen qatar kóptegen nanym men ǵuryppen ushtasqan qasıetti nysan. Bul qasıetti maǵyna ony qazaqtar úshin erekshe etedi. Shańyraq úıdi, úı oshaǵyn jáne rýdyń jalǵasyn beıneleıdi, bul onyń qazirgi Qazaqstannyń Eltańbasynda bolýyn túsindiredi. Shańyraq urpaqtan-urpaqqa jalǵasyp kele jatqan otbasylyq jádiger boldy jáne onyń mańyzy ásirese ákesine tıesili qara shańyraqqa-shańyraqqa qurmetpen qaraıtyn uldary úshin óte mańyzdy boldy. Qazaqtar shańyraqqa qarap mańyzdy ant berdi», - dedi ekskýrsııa ótkizýshi Sholpan Nuǵymanova.
Aıta keteıik, múmkindigi shekteýli adamdar úshin ónermen tanysýdyń taktıldi ádisi qarastyrylǵan, «Janasý» shaǵyn ekspozıtsııasy jasalǵan, eksponattardy qolmen ustaýǵa bolady.
