Shanhaıdaǵy halyqaralyq ımporttyq kórmege 30 qazaqstandyq óndirýshi qatysady
30 qazaqstandyq óndirýshi 5-10 qarasha aralǵynda Shanhaıda ótetin altynshy Qytaı halyqaralyq ımporttyq kórmesine (CIIE) qatysady, dep habarlaıdy Kazinform.
«Qaztrade» AQ eksportty ilgeriletý departamentiniń dırektory Mıra Jańabergenovanyń aıtýynsha, Qazaqstan Qytaıdaǵy ımporttyq kórmede ulttyq jáne kommertsııalyq eki stendte bar.
«AÓK-ten ınnovatsııaǵa deıin» - Ulttyq pavılonymyzdyń negizgi tujyrymdamasy. Biz Qazaqstannyń negizgi baǵyttaryn usynamyz, munda agroónerkásiptik keshen, ınvestıtsııalar, týrızm, eksport, logıstıka jáne basqa da baǵyttar bar», - dedi «Qaztrade» ókili.
Ol sondaı-aq kommertsııalyq pavılonnyń stendi «Azyq-túlik jáne aýyl sharýashylyǵy ónerkásibi» sektorynda ornalasqanyn, onda 30 qazaqstandyq óndirýshi óz ónimderin shyǵarǵanyn aıtty. Bul makaron jáne kondıterlik ónimder, ósimdik maılary, bal, sút ónimderi, sonyń ishinde qurǵaq túıe men bıe súti jáne t.b. bar.
«Qazaqstandyq ónimder Qytaıdaǵy kórmede shıkizattyq emes sektordyń otandyq óndirýshilerin syrtqy naryqtarǵa shyǵarý jónindegi memlekettik baǵdarlamany iske asyrý sheńberinde usynyldy», - dep atap ótti Mıra Jańabergenova.
«Qaztrade» AQ ókili Qazaqstan 2018 jyly jumys isteı bastaǵan sátten bastap Qytaıdyń halyqaralyq ımporttyq kórmesine qatysatynyn tilge tıek etti. Bes jyl ishinde Kórme alańynda 100-den astam qazaqstandyq kompanııa 260 mln-nan asatyn somaǵa eksporttyq kelisimsharttar jasasty.
Buǵan deıin Beıjińde ótken baspasóz máslıhatynda QHR Kommertsııa mınıstriniń orynbasary Shen Tsıýpın habarlaǵandaı, bıylǵy jyly Qytaıdyń altynshy halyqaralyq ımporttyq kórmesinde 70-ke jýyq el ulttyq ekspozıtsııalardy ornalastyrdy. Onyń 11-i kórmege alǵash ret oflaın formatta qosylady. Qazirgi CIIE-niń qurmetti qonaqtary Qazaqstan, Vetnam, Serbııa jáne basqa da memleketter bolady.
Qytaıdyń altynshy halyqaralyq ımporttyq kórmesi 5-10 qarasha aralyǵynda Shanhaıda ótedi. EKSPO-ǵa álemniń 154 elinen kelgen delegatsııa, sondaı-aq halyqaralyq uıymdardyń ókilderi qatysady.
Qazirgi ýaqytta 3,4 myńnan astam kompanııa kórmege qatysý úshin tirkeldi. Sondaı-aq atalmysh aýqymdy is-sharaǵa 410 myńǵa jýyq kásibı Satyp alýshy keledi dep kútilýde.
