Shanhaı men Sıanda jumys isteıtin eki qandasymyz tanystyryldy — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Ózbekstan men Qazaqstan arasynda taǵy bir áýe baǵyty ashyldy — ÓzA
Qos baýyrlas el — Ózbekstan men Qazaqstan arasyndaǵy baılanys taǵy bir mańyzdy qadammen nyǵaıa tústi.
Túrkistan qalasynan Samarqanǵa baǵyt alǵan alǵashqy jolaýshylar ushaǵy keshe Samarqan halyqaralyq áýejaıyna sátti qondy.
Bul týraly osy aptada «ÓzA» aqparat agenttigi málimdedi.
Habarlamada atalǵan baǵyt Qazaqstannyń «QAZAQ AIR» áýe kompanııasy tarapynan iske qosyldy. Endi bul reıs Astana, Túrkistan jáne Samarqan qalalaryn ózara baılanystyryp, óńirlik týrızm men iskerlik qarym-qatynastyń damýyna jańa serpin bermek.
Turaqty áýe reısteri aptasyna eki márte — beısenbi jáne jeksenbi kúnderi oryndalady. Bul — jolaýshylar úshin qolaılylyqty arttyryp qana qoımaı, eki el arasyndaǵy mádenı, ekonomıkalyq jáne týrıstik baılanystardy odan ári jandandyrýǵa yqpal etpek.
Aıta keteıik, alǵashqy reıstiń kelýine oraı ótken arnaıy is-sharaǵa Qazaqstan Respýblıkasynyń Samarqan qalasyndaǵy bas konsýly men Samarqan oblysy ákimdiginiń ókilderi qatysqan.
Sondaı-aq osy aptada «ÓzA»-da «Buharaǵa keletin saıahatshylar legi jyldan jylǵa kóbeıip keledi» degen taqyryptaǵy fotoreportaj jarııalandy.
Atalǵan aqparat kóziniń dereginshe, Buharanyń ǵasyrlar boıy saqtalǵan tarıhı eskertkishteri búginde alys-jaqynnan kelgen sheteldik týrıstermen qaıtadan jandanyp, qala óziniń tarıhı bolmysymen tańqaldyryp otyr.
Atap aıtqanda, bıylǵy jyldyń alǵashqy úsh aıynda Reseıden — 9758, Qytaıdan — 2878, Qazaqstannan — 1830, Úndistannan — 1353, Japonııadan — 1338, Italııadan — 1161, Túrikmenstannan — 961, Frantsııadan — 929, AQSh-tan — 785, Irannan — 738, Ispanııadan — 668, Malaızııadan — 611 jáne Indonezııadan — 653 týrıst Buharaǵa saparlap kelgen.
Týrızm salasyndaǵy eń úzdik baǵyttardyń biri retinde tanylatyn Buharaǵa jyl sońyna deıin 2 mıllıon 200 myńnan astam sheteldik týrıst keledi dep kútilýde, dep jazady ózbekstandyq BAQ.
Shanhaı qalasynda turatyn dári jasaıtyn jas maman Baýyrjan — CNR
Osy aptada Qytaıdyń «Ortalyq halyq radıosy» aqparattyq agenttigi Shanhaı qalasynda turatyn dári jasaýshy jas maman Baýyrjan Seıilbekuly atty qandasymyzdan alǵan vıdeo suhbatyn jarııalady.
Shanhaı qalasynda turatyn dári jasaıtyn daryndy jas maman Baýyrjan Seıilbekuly túski bir saǵattyq demalys ýaqytyn paıdalanyp suhbat bergen. Onyń ár kúni qarbalas ótedi, tańerteńgi qyzmetke kelýden bastap, túrli kúrdeli aspaptarmen dári-dármekterdi zerttep, odan qatysty derekterdi, anyqtamalardy shyǵarýǵa deıin barlyq jumystar daryndy jas mamannyń mindeti eken.
Onyń Shanhaıdaǵy ómiri, qyzmeti týraly tilshige bergen suhbatyn qysqasha tanystyra keteıik.
Baýyrjan Seıilbekulynyń aıtýynsha, ol qazirgi ýaqytta Shanhaıdaǵy farmatsevtıkalyq kompanııada jumys isteıdi.
2012 jyly Shanhaı Tszıao Tong ýnıversıtetine tamaq ónerkásibi jáne ınjenerııa mamandyǵyna qabyldanǵan.
2016 jyldan bastap Shanhaı farmatsevtıkalyq kompanııasynda peptıdtermen baılanysty jumyspen aınalysa bastaǵan.
Onyń kúndelikti jumysy aldymen birinshi zertteletin úlgilerdi suryptaýmen bastalady.
Baýyrjan qol astyndaǵy áriptesterine jasaıtyn eksperımentter men jumystardy retteıdi. Al ekinshi kezekti jumysy bir kún buryn jasalǵan eksperımenttik esepti qaıta tekserýmen jalǵasady. Sosyn jańa preparattarǵa zertteý josparlaryn jasaıdy eken.
Onyń qazirgi jumysy farmatsevtıka salasy hımııamen tyǵyz baılanysty sala.
Baýyrjan Seıilbekuly óz jumysynda klıenttermen aǵylshyn tilinde sóılesý óte mańyzdy ekenin aıtady. Ásirese, birneshe jyl buryn sheteldik kompanııada qyzmet istegen kezinde jumys tili aǵylshyn tili bolǵan. Qazirgi ýaqytta qytaılyq kompanııada jumys istegenimen tutynýshylardyń barlyǵy eýropalyq jáne basqa da sheteldik tutynýshylar bolǵandyqtan qazirgi jumys tilderi áli de qytaı jáne aǵylshyn tilderi bolyp tabylady.
B. Seıilbekuly 2020 jyly úılengen. Onyń áıeli de Shanhaı Tszıao Tong ýnıversıtetin bitirgen. Ekeýi oqýdy támamdaǵan soń damý úshin Shanhaıda qalýdy sheshken. Byltyr sábıli bolǵan. Endigi josparlary jarqyn bolashaq úshin Shanhaı qalasynda mamandyǵymyz boıynsha jumysymyzdy jalǵastyra berý deıdi qandasymyz.
Sondaı-aq osy aptada «CNR» basylymynda «Qushtar: bul meniń ósken jurtym» degen taqyryptaǵy Qytaıdyń tarıhı astanasy sanalatyn Sıan qalasynda jumys isteıtin qandasymyz týraly vıdeo suhbat jarııalandy.
«Daıanta munarasy mańyndaǵy jastyq kóktem nemese bul meniń ósken jurtym», deıdi Sıanda qyzmet isteıtin Qushtar Muhtaruly.
Qytaılyq BAQ-tyń dereginshe, baıyrǵy qala Sıandaǵy Daıanta munarasy ejelgi zamannan bergi jyljyp ótken jyldar, aýnap ótken aılardyń aıǵaǵy. Ol osynda ózge jurttan kelip, qonys teýip, órken jaıǵan jandardyń ómir kartınasynyń kýási ispetti.
Búgin tilimizge tıek bolatyn áńgime Sıan Elektrondy ǵylym-tehnıka ýnıversıtetinde jetekshi ustaz qyzmetin atqaratyn geroıymyzdyń jastyq kóktemi jaıly bolady, dep jazady Qytaıdyń «Ortalyq halyq radıosy».
Qaıtpas jastyń qumǵa bitken torańǵydaı qaısar rýhy 13 patshalyqtyń astanasy bolǵan baıyrǵy qaladan óz ómir jolyn tapqan. Ol osyndaǵy jeti jylǵy jumysynan túıgeni, sezgeni de osy óńirge tamyr tartqany boldy. Sondyqtan ol Sıandy bul meniń ósken jurtym, dep sanaıdy eken.
Onyń Sıanǵa qalýyna eki sebep bolypty. Birinshisi atalǵan qalanyń klımaty týǵan jeri Shyńjańǵa uqsaıdy. Osynda kele salyp aýa raıyna tez úılesip ketipti. Ekinshiden Sıan Qytaıdyń on úsh patshalyǵynyń ordasy bolǵan. Osyndaı óte baı mádenıet meni qyzyqtyrdy deıdi ol.
Irannyń bir ýnıversıtetinde álemniń 130 elinen on myńdaǵan stýdentter bilim alýda — ParsToday
Irannyń Mustafa ál-Álámııa ýnıversıtetiniń rektory bul oqý orynynda álemniń 130 elinen on myńdaǵan sheteldik stýdentterdiń bilim alatynyn aıtty, dep habarlaıdy ParsToday aqparat agenttigi.
Atalǵan BAQ-tyń málimetinshe, Irannyń Mustafa ál-Álámııa ýnıversıtetiniń rektory Álı Abbasıdyń senbi kúngi habarlaýy boıynsha, Irannyń Qum semınarııasy ǵalymdar, professorlar men ǵylym qaıratkerleriniń sany, osy salada usynylǵan bilimderdiń alýan túrliligi jáne osy salanyń el ishindegi jáne syrtyndaǵy ártúrli ǵylymı ortalyqtarmen keń baılanysy turǵysynan álemde kórnekti.
Abbasıdyń málimetinshe, Ál-Mustafa qaýymy qazir 130-dan astam ulttyń on myńdaǵan stýdentterin qabyldaıdy. Onyń 40 paıyzǵa jýyǵyn qyzdar men áıelder quraıdy.
Sondaı-aq ParsToday aqparat agenttiginde «Iran ǵalymdarymen kezdesý» degen taqyryptaǵy aqparat jarııalandy.
Irandyq BAQ-tyń dereginshe, 2025 jylǵy 2 mamyrda ál-Farabı QazUÝ Shyǵystaný fakýltetine Allame Tabatabaı ýnıversıtetiniń ǵylymı ister jónindegi prorektory Mandana Tısheıar hanym men Iran ulttyq kitaphanasy dırektorynyń orynbasary Mortaza Nýrı myrza resmı saparmen kelgen.
Irandyq ǵalymdar Shyǵystaný fakýlteti Taıaý Shyǵys jáne Ońtústik Azııa kafedrasynyń professor-oqytýshylarymen kezdesti. Kezdesý barysynda barysynda eki eldiń mádenı jáne ǵylymı baılanystaryn nyǵaıtý, sondaı-aq bilim men ǵylym salasyndaǵy ózara yntymaqtastyqty arttyrý máseleleri talqylandy.
ParsToday agenttiginiń dereginshe, eki ýnıversıtet arasynda ǵylymı zertteýler jáne mádenı jobalar boıynsha birlesken jumystardy damytý joldary da qarastyrylǵan.
Sondaı-aq Mandana Tısheıar hanym atalǵan kezdesý eki tarap úshin mańyzdy ekenin jáne ǵylym men mádenıettiń damýyna qosar úlesi zor bolatynyn atap ótken. Sonymen qatar, ol QazUÝ men Tabatabaı ýnıversıteti birlesip shyǵaratyn jańa ǵylymı-tanymdyq jýrnal «Naýryz» týraly keńinen baıandaǵan.
Aqtóbe men Sıan arasynda tikeleı áýe reısin ashý máselesi týraly bastama kóterildi — «Halyq gazeti»
Sıan qalasynda Aqtóbe oblysynyń ákimi Ashat Shaharov pen Shensı ólkesiniń ólke bastyǵynyń resmı kezdesýi ótti, dep habarlaıdy «Halyq gazeti» aqtobegazeti.kz basylymyna silteme jasap.
Atalǵan kezdesý aıasynda óńirdiń ınvestıtsııalyq jáne ónerkásiptik áleýeti tanystyrylǵan.
Óńir basshysy Shensıdyń ólke bastyǵy Chjao Ganǵa Aqtóbe men Sıan arasynda tikeleı áýe reısin ashý máselesi týraly bastama kótergen. Ol mundaı áýe qatynasynyń óńirler arasyndaǵy saýda-ekonomıkalyq yntymaqtastyqty damytýǵa jáne týrıstik aǵyndy arttyrýǵa septigin tıgizetinin atap ótken.
Aıta keteıik, qabyldaý barysynda Aqtóbe oblysynyń ındýstrııalyq-ınnovatsııalyq damý basqarmasy men Shensı provıntsııasynyń kommertsııa basqarmasy arasynda saýda-ekonomıkalyq yntymaqtastyq týraly memorandýmǵa qol qoıyldy.
Túrkııadan shyqqan «Qaıyrymdylyq kemesi» Sýdanǵa jetti — TRT
Sýdandaǵy gýmanıtarlyq daǵdarys ýshyqqan kezeńde 1600 tonnadan astam kómek tıelgen túrik gýmanıtarlyq kómek kemesi Port-Sýdanǵa jetip, mańyzdy qoldaý kórsetti, dep habarlaıdy Túrkııa Radıo Televızııa portaly.
«TRT»-nyń dereginshe, «Ekinshi Qaıyrymdylyq kemesi» dep atalatyn bul keme Adam quqyqtary men bostandyqtary gýmanıtarlyq kómek qory (IHH) tarapynan jiberilgen. Keme 1605 tonna azyq-túlik, kıim-keshek, gıgıenalyq materıaldar men baspana jabdyqtaryn jetkizgen.
Dúısenbi kúni kemeni Túrkııanyń Sýdandaǵy elshisi Fatıh Iyldyz, IHH Basqarma múshesi Mehmet Enes Arykan, Sýdan gýmanıtarlyq kómek komıssary Selva Adem jáne jergilikti bılik ókilderiniń qatysýymen resmı rásimmen qarsy aldy.
Aıta keteıik, Elshi Iyldyz Anadoly agenttigine bergen suqbatynda «Bul — Túrkııanyń qaqtyǵys bastalǵaly beri jibergen tórtinshi gýmanıtarlyq kómek kemesi. Olardyń ekeýin Túrkııanyń Apat jáne tótenshe jaǵdaılardy basqarý tóraǵalyǵy (AFAD) uıymdastyrdy jáne bul IHH-niń ekinshi kemesi», — degen.