Shámshi Qaldaıaqovtyń ánderi strımıngtik platformalarda resmı jarııalanady
ALMATY. KAZINFORM - Qazaqstannyń Halyq ártisi, sazger Shámshi Qaldaıaqovtyń ánderi alǵash ret álemniń jetekshi strımıngtik platformalarynda resmı túrde jarııalanady.
«Shámshi álemi» qoǵamdyq qorynyń dırektory Botagóz Qaldaıaqovanyń aıtýynsha, tájirıbe úshin aldymen Spotify, Yandex Music, YouTube jáne basqa da platformalarǵa áýenin de, sózin de Shámshi jazǵan “Qushaq jaıǵan qandaı adam” áni ornalastyrylǵan. Endi kompozıtordyń 95 jyldyǵyna arnalǵan albom «Shámshi álemi» qoǵamdyq qorynyń jáne «õzen» mýzykalyq dıstrıbıýtorynyń qoldaýymen 14 naýryzda jaryqqa shyǵady.
- Avtorlyq jáne sabaqtas quqyqtar týraly zańǵa sáıkes monetızatsııadan tabys alý úshin ánderdiń mátin avtorlarymen kelisim bolýy kerek. Sondyqtan Shámshiniń 70-ke jýyq ániniń sózin jazǵan avtorlarmen baılanysyp, 45-ine baılanysty kelisimge keldik. Sodan keıin baryp biz zańdy túrde resmı ánderdi platformalarǵa jarııalaǵaly jatyrmyz. Biz avtorlyq quqyq týraly zańdy saqtaı otyryp, qalaı strımıngke shyǵýǵa bolatynyn úlgi retinde kórsetkimiz keledi, - dedi Botagóz Qaldaıaqov.
Aıta ketken jón, «Shámshi álemi» qoǵamdyq qory kompozıtordyń mýzykasynyń eksklıýzıvti quqyqtaryna ıe boldy. Al 2025 jyldan bastap án mátinderiniń quqyqtaryn da basqarady.
- Bul bastamadan keıin ózge avtorlardyń muragerleri avtorlyq quqyq boıynsha máselelerdi sheshý, lıtsenzııalaý, zańdastyrý boıynsha jumys isteı bastaýy múmkin. Qazirgi ýaqytta strımıng qarqyndy damyp keledi. Erteń platformalarda Shámshi ánderiniń birinshi albomy jarııalanady, bolashaqta ekinshisin de jaryqqa shyǵaramyz dep úmittenemin, - dedi «õzen» mýzykalyq dıstrıbıýtorynyń ókili Tımýr Nazarǵalıev.
Eske salaıyq, buǵan deıin Shámshi Qaldaıaqovtyń urpaqtary kompozıtordyń ánderinen qansha qalamaqy alyp júrgenin jazǵan edik.
Sondaı-aq Qazaqstanda avtorlarǵa arnalǵan biryńǵaı tsıfrlyq platforma qurylýy múmkin ekenin jazǵanbyz.