Shamalǵan stantsııasynyń aınalma joly paıdalanýǵa beriledi

NUR-SULTAN. QazAqparat - Bıylǵy jol-qurylys maýsymynda Almaty oblysyndaǵy Kúrti-Býrylbaıtal, Kúrti-Qapshaǵaı, Úsharal-Dostyq jáne Shamalǵan stantsııasynyń aınalma joldary paıdalanýǵa beriledi, dep habarlaıdy QazAqparat.

«QazAvtoJol» kompanııasy baspasóz qyzmetiniń málimetinshe, Kúrti-Býrylbaıtal aralyǵyndaǵy 143 shaqyrym joldyń qurylys jumystary jyl sońyna deıin aıaqtalady.

«Budan bólek, Kúrti-Qapshaǵaı (67 shaqyrym) jobasynyń bir baǵyttaǵy qozǵalysyn ashý josparlanyp otyr. Sondaı-aq, Úsharal-Dostyq (180 shaqyrym) tas jolynda qozǵalys ashylady», - delingen baspasóz habarlamasynda.

Qazir uzyndyǵy 6 shaqyrymǵa sozylyp jatqan Shamalǵan stantsııasynyń aınalma jolynda qurylys-montajdaý jumystary júrgizilip jatyr. Jyldyń sońyna deıin bul nysan da paıdalanýǵa berilmek.

Aıta keteıik, buǵan deıin Shamalǵan stantsııasyndaǵy jol-kólik apatynan soń jańa kópir salynyp jatqany týraly habarlanǵan bolatyn.