Shalqarda týyp-ósken kásipkerler áleýmettik qurylystardy óz qoldaryna aldy - Aqtóbe oblysy
Aqtóbe oblysy, Shalqar aýdanynda týyp-óskender búgin týǵan jerine qaıta oralyp, respýblıkalyq forýmǵa qatysyp jatyr. Barlyǵy 2,5 myńnan astam adamdy qamtyǵan forýmǵa elimizdiń bas neırohırýrgi Serik Aqsholaqov ta qatysty. Kelisim boıynsha «Týǵan jerge taǵzym» aktsııasy aıasynda áleýmettik nysandardyń qurylysyn júrgizý úshin memorandýmdarǵa qol qoıyldy. Kásipkerler aýdanǵa Jastar saraıyn, kúndizgi statsıonary bar aýrýhana men 100 oryndy balabaqsha, Qaýyljyr aýylynda sport saraıy men balabaqsha, Jańaqonys aýylynda aýyl klýbyn salý josparlandy. Al Danııar Qoblandın Shalqar qalasyndaǵy kóshege jol salý úshin 75 mıllıon teńge aýdarady. Bul qarjyǵa bar bolǵany 2,5 shaqyrym jol jóndelmek. Forým kezindegi áleýmettik jobalardyń jalpy quny 630 mln. teńgeni qurady.
«Memleket basshysy Nursultan Nazarbaev: «Bizde bir Otanymyz - Qazaqstan bar, ekinshisi - joq» dedi. Árbir azamat múmkindiginshe óz týǵan jerine kómektesýi kerek. Kómek aqshalaı nemese qandaı da bir obektilerdiń qurylysy bolý mindetti emes. Mysaly, kórnekti neırohırýrg dáriger Serik Aqsholaqov týǵan jerin umytpaı, kóptegen qaıyrymdylyq operatsııalaryn ótkizdi. Patsıentterdiń ómirin qutqaryp, jas aqtóbelik dárigerlerge qaıyrymdy isin úıretedi. Ár adam ózi tárbıelengen týǵan jerine jıi kelip, óskeleń urpaqpen kezdesip, bar jetistikterin týǵan ortasymen bólisýge tıis» - dedi aımaq basshysy Berdibek Saparbaev.
Aqtóbe oblysy ákiminiń baspasóz qyzmetiniń habarlaýynsha, «Baqytty bala» aımaqtyq baǵdarlamasy aıasynda 100 bala Astanada demalý, 25 bala Túrkistannyń tarıhı jáne mádenı jerlerine saıahat jasaý úshin joldama aldy. Al 373 oqýshy Oral qalasyndaǵy jazǵy lagerde tynyǵady. Ata-anasynyń qamqorlyǵynsyz qalǵan 38 jetim balanyń Turǵyn úı qurylys jınaq bankindegi esepshotyna 3,8 mln teńge aýdarý úshin arnaıy sertıfıkat tapsyryldy. Ári kópbalaly 10 ana shıpajaıǵa joldama aldy.
