Shala týǵan sábılerge 1,3 myńǵa jýyq jyly kıim toqydyq - volonter
- Klýbtyń «28 ilmek» ataýy erekshe, ol qaıdan shyqqan?
- «28 ilmek klýby» 2012 jyly Qazaqstanda quryldy. Negizin qalaýshy fotojýrnalıst – Qarlyǵash Nurjanova, kópshilik ony «Karla Nýr» atymen biledi. Birde ol ınkýbatorda jatqan náresteniń aıaǵynda medbıbiler toqyǵan kók shulyqty kóredi. Onyń ne úshin qajet ekenin bilgennen keıin shala týǵan nárestelerge jyly kıim-keshek toqıtyn klýb qurý oıy keledi. Áleýmettik jobanyń ataýy náresteniń aıaq ólshemimen baılanysty, 28 ilmekpen náresteniń shulyǵy toqylady. Qazir bul klýbtyń fılıaldary Qazaqstannyń onnan astam qalasynda, TMD elderiniń 12-sinde jumys isteıdi.
- Siz bul klýbqa qalaı keldińiz?
- Petropavlda klýbtyń fılıaly 2018 jyly ashyldy. Onyń úılestirýshisi 4 balanyń anasy, úlgermeıtin bolǵandyqtan, meniń aınalysýymdy ótindi. Al maǵan qaıyrymdylyq ispen aınalysý unaıdy. Ózim de toqyǵandy unatamyn. Sondyqtan birden usynysty qabyl aldym. Negizgi jumysyma kedergi keltirmeıdi. Veb-stýdııada joba-menedjeri bolyp eńbek etemin. Sondaı-aq ázirge óz turmysqa shyqqan joqpyn, sondyqtan maǵan basqalarǵa qaraǵanda qoǵamdyq jumyspen aınalysý jeńilirek. Bul da bir jaqsy tájirıbe, bárine úlgerý úshin ýaqytymdy josparlap úırendim. Óıtkeni, jaqyndaryma da maǵan súıikti isimmen aınalysýǵa múmkindik bergenderi úshin, únemi qoldaý kórsetip otyrǵandary úshin alǵysym sheksiz.
- Klýbqa kimder múshe? Kúni jetpeı týǵan nárestelerge ǵana kómek kórsetesizder me?
- Klýbqa múshe qyzdarymyzdy, volonterlerdi biz «perızattar» dep ataımyz. Olar dekret demalysynda otyrǵan qyz-kelinshekter nemese jumys isteıtin analar. Ortasha jasy – 30-40-tarda. Kóp balaly analar da, ózderi de shala bop týǵan qyzdar da bar. Bireýler tek symmen ǵana toqıdy, endi biri kúrshekpen jumys istegendi unatady. Olarǵa belgili bir qoıylatyn talap joq. Bizdiń qatarymyzǵa qosylyp, toqýdy úırengender de bar. Shala týǵan balalarǵa arnalǵan kıim-keshekterdi toqý boıynsha sheberlik sabaǵyn uıymdastyramyz. Perınataldyq ortalyqqa ádette jıyntyq etip aparamyz, oǵan kókirekshe, bas kıim, shulyq-qolǵap, komforter-oıynshyq jáne jamylǵy kiredi. Bul kıim-keshek dene salmaǵy 500 gramnan joǵary sábılerge qoldanylady.
Ádette kúni jetpeı týǵan sábılerge qosymsha jylý qajet. Óıtkeni shaqalaqta teri astyndaǵy maı júktiliktiń tek 8-9 aıynda ǵana paıda bolady. Jylý jetpegen jaǵdaıda olar energııany jetilýge emes, denesin jylytýǵa jumsaıdy. Sondyqtan shala týǵan sábılerdiń denesin jyly ustaý qajet. Budan basqa mindetti túrde taza júnnen toqylǵan kıimdi qoldanǵan jón. Mundaı balalar jylýdy basynda kóp joǵaltady, sondyqtan bas kıim kıgizý qajet. Al qan aıaq-qolǵa jetkenge deıin tez sýyıdy, sondyqtan qolǵap-shulyq qoldanylady. Júnnen toqylǵan kıim massajer retinde de qoldanylady. Deneni titirkendiredi, qan aınalymyn jaqsartady. Sábılerde tynys alý júıesi durys jetilmegen, sondyqtan qatty uıqyǵa ketip, dem almaýy múmkin. Al toqyma buıymdar deneni jybyrlatyp, ol únemi qozǵalýǵa májbúr bolady.
Al oıynshyqty taza maqta jipten toqımyz. Alǵashqy segizaıaq oıynshyqty danııalyq ana óz balasyna toqyǵan eken. Segizaıaqtyń qarmaýyshyn ustaǵan shaqalaq ony kindikke uqsatyp, ózin qaýipsiz sezinedi, ınkýbatorda jatyp, medıtsınalyq qondyrǵynyń tútikterin tartqylamaıdy.
- Jipti qaıdan alasyzdar?
- Jipti, ádette, ózimiz satyp alamyz. Keıde demeýshiler tabylyp, syılaıdy. Keıde bizge jaramaıtyn, qospasy bar jipterdi syılaıdy. Onda toqyǵan buıymdarymyzdy Analar úıine aparyp beremiz. Ondaǵy qyzdar da kómekke muqtaj. Oblysta kúni jetpeı týatyn sábıler sany onsha kóp emes. Byltyr oblysta osyndaı 300-den astam shaqalaq dúnıege keldi. Jańa kıim-keshek kerek bolǵanda perınataldyq ortalyqtan habarlasady. Biz buıymdarymyzdy aparyp tapsyramyz. Sondyqtan asa qıyndyq joq. Qurylǵan úsh jyldyń ishinde 1 300-ge jýyq kıim-keshekti toqyp tapsyrǵan ekenbiz.
- Mundaı qoǵamdyq jumys kóp ýaqytty qajet etedi. Ne úshin isteısizder?
- Bul saýaldy jıi estımin. Mundaı jumysqa qansha aqsha tólenetinin de suraıtyndar bar. Biz tegin jumys isteımiz. Bul klýbqa jınalǵandardyń nıetimiz bir. Birinshiden, basqalarǵa kómek kórsetý arqyly janyń rahattanady. Ekinshiden, ár kezdesýimiz biz úshin mereke. Kóbine kezdesýimiz dámhanada ótedi, óıtkeni arnaıy jınalatyn ornymyz joq. Jazda taza aýada, saıabaqta kezdesemiz. Toqýdan basqa bir-birimizdi týǵan kúnderimizben quttyqtaımyz. Ortaq chatta túrli taqyrypty qozǵap, pikir almasamyz. Máselen kelesi aptada mereke uıymdastyrmaqshymyz, bir-birimizge syılyq syılaıtyn bolyp sheshtik. Óıtkeni 17 qarasha – halyqaralyq shala týǵan sábıler kúni.