Shala týǵan balalar arasynda týa bitti kóz aýrýy anyqtalyp jatyr
AQTÓBE. KAZINFORM – Aqtóbedegi perınataldy ortalyqta 100-den astam balanyń kózi tekserilse, onyń 15-inen kóz aýrýy anyqtalady. Ortalyqta retınaldy kamera kómegimen dıagnoz qoıylyp, ota jasaýǵa múmkindik bar.
Aqtóbe oblysynda jyl saıyn 20 myńǵa jýyq sábı ómirge keledi. Onyń 450-ge jýyǵy aıy-kúni jetpeı, túrli tekserýden ótedi. Dál osy balalardyń 20% jýyǵyna retınopatııa dıagnozy qoıylady. Qazirgi kezde kóz janaryndaǵy tamyrlardyń ornalasýy, kóz qabyqtarynyń durys jetilýi men ondaǵy túrli aýrýdy anyqtaýǵa arnalǵan retınaldy kamera kópshilikke qoljetimdi bola tústi.
- Bul aýrýdy erte anyqtap, em júrgizbese bala ómir boıy soqyr bolyp qalýy múmkin. Qazir osy sanatqa kiretin balalarǵa skrınıng jasap, aýrýdy erte anyqtap jatyrmyz. Keıin perınataldyq ortalyqta ota jasalady. Burynǵydaı Almaty men Astanaǵa barýdyń qajeti joq. Jańa apparatty qoldaný kezinde dáriger ǵana emes, balanyń anasy da bar jaǵdaıdy ekrannan kóre alady. Emnen keıingi jaǵdaıdy da kórýge bolady. Jalpy 2021 jáne 2022 jyldary Ayala qory oftalmologııalyq lazer men tikeleı emes oftalmoskop berdi. Bul qurylǵy arqyly myńnan astam balaǵa dıagnostıka jasaldy,- dedi Aqtóbe perınataldyq ortalyǵy dırektorynyń orynbasary Tolqyn Serǵazına.
Aqtóbe perınataldy ortalyǵyndaǵy oftalmolog dáriger Kámshat Meshitbaeva shaqalaqtardyń kóz aýrýyn anyqtaý, emdeýge beıimdelip, qazir túrli ota da jasap júr.
- Bul aýrýdyń óz satylary bolady. Jańa apparat arqyly qaı satyda ekenin birden bilýge bolady. Biz tekserip bolǵan soń qosymsha em júrgizemiz nemese otaǵa daıyndaımyz. Muny ózim ǵana emes, ata-anasy da kórip, sheshim qabyldaı alady. Mundaı aýrýlar kóbine aıy-kúni jetpeı ómirge kelgen balada anyqtalady. Sebebi olardyń dene múshesi tolyq jetilmeıdi, keıde túrli ınfektsııa juqtyryp ómirge keledi,- dedi oftalmolog dáriger Kámshat Meshitbaeva.
