Shákárimniń «Saıat-qora» ekspozıtsııasy jóndeldi

SEMEI. QazAqparat - 2006 jyldyń qarasha aıynda Jıdebaıda uly Abaıdyń shákirti, fılosof, aqyn Shákárim Qudaıberdiulynyń murajaıy ashylǵan edi. Murajaı Shákárimniń «Saıat-qora» ekspozıtsııasy dep atalady. Bıyl mádenı nysanǵa 12 jyldan keıin jóndeý jumystary júrgizilip, jańa jádigerler ákelindi, dep habarlaıdy QazAqparat.

Bıyl Shákárim qajynyń 160 jyldyq mereıtoıyna oraı tozyǵy jetken mádenı nysanǵa aǵymdaǵy jóndeý jumystary júrgizildi. Mýzeı kireberisi qaıta qalanyp, jańasha boı kóterdi. Barlyq jumystardy mýzeı qyzmetkerleri «Aqshyń» korporatsııasynyń basshysy Marat Qurmanbaevtyń aqshalaı kómeginiń arqasynda ózderi jasap shyqqan.

«Saıat qora» ekspozıtsııasy aqynnyń ómiri men sońynda qaldyrǵan murasyn nasıhattaýǵa arnalǵan. Abaı qoryq-mýzeıiniń qorynda jınaqtalǵan aqynnyń ósken ortasy, alǵan bilimi týraly estelikter, oı-tanymyn kórsetetin ádebıetter, Abaımen qarym-qatynasyna baılanysty materıaldar, qajylyq sapary, qoǵamdyq qyzmeti men Alashorda úkimetine qatysy týraly muraǵattardan tabylǵan derekter, qoljazbalar men aqyn shyǵarmalarynyń basylymdary, murageri Ahat Shákárimulynyń jeke zattary men sol zamannan habar beretin etnografııalyq zattar oryn alǵan. Jóndeý jumystarynan keıin taǵy da tolyqtyrý jumystary júrgizilgen.

«Bıyl Shákárim qajy Qudaıberdiulynyń 160 jyldyq mereıtoıyna oraı «Saıat qora» kúrdeli jóndeýden ótip, reekspozıtsııa jasaldy. Bul jumystar «Saıat qoranyń» taqyryptyq mazmunyn baıytyp, eksponattar qataryn molaıtýǵa múmkindik beredi. Jalpy qurylys mamyr aıynda bastalyp, shilde aıynyń sońynda aıaqtaldy. Abattandyrý jumystary júrgizildi. Eksponattar ákelindi. Olardyń ishinde at ábzelderi, jabaıy ań terileri, shejire men tanymdyq materıaldar, sol zamannyń turmystyq zattary bar. Ásirese, Shákárim babamyzdyń zamanýı materıaldan somdalǵan kelbeti jurtshylyq kóńilinen shyqsa kerek»,-dedi mýzeı dırektory Bolat Júnisbekov.