Shahrat Nuryshev Japonııanyń Parlamenttik Syrtqy ister vıtse-mınıstrimen kezdesti

NUR-SULTAN. QazAqparat - Qazaqstan Syrtqy ister mınıstriniń birinshi orynbasary Shahrat Nuryshev Japonııanyń Syrtqy ister Parlamenttik vıtse-mınıstri Satoshı Nakanıshımen kezdesý ótkizdi, dep habarlaıdy QazAqparat QR SІM resmı saıtyna silteme jasap.

Kezdesý barysynda taraptar Qazaqstan-Japonııa strategııalyq áriptestiginiń jaı-kúıi men damý perspektıvalaryn talqylady.

Sh.Nuryshev joǵary deńgeıdegi saıası dıalogtyń, Qazaqstan men Japonııa parlamentteri arasyndaǵy tyǵyz baılanystardyń, saýda-ekonomıkalyq jáne ınvestıtsııalyq baılanystardyń údemeli damýdyń, sondaı-aq eki el arasyndaǵy gýmanıtarlyq baılanystardyń mańyzdylyǵyn atap ótti.

S.Nakanıshı Qazaqstannyń ıadrolyq qarýdy taratpaý jáne ıadrolyq qarýsyz álem qurý týraly ıdeıany ilgeriletý máselelerindegi erekshe rólin atap ótti. «Ortalyq Azııa + Japonııa» dıalogy, sondaı-aq halyqaralyq uıymdardyń, ásirese BUU-nyń sheńberinde eki eldiń ózara is-qımylyna joǵary baǵa berildi.

Japon tarapyna COVID-19 emdeý úshin qajetti medıtsınalyq jabdyqtardy satyp alýǵa grant bergeni úshin alǵys bildirildi. Bul dostyq peıil Qazaqstan men Japonııanyń strategııalyq áriptestik rýhynyń kórinisi.

Taraptar tsıfrlandyrý, qarjy, aýyl sharýashylyǵy jáne jasyl ekonomıka sııaqty salalardaǵy ınvestıtsııalyq yntymaqtastyqty odan ári ártaraptandyrý týraly ýaǵdalastyqqa qol jetkizdi. Osyǵan baılanysty Qazaqstan men Japonııanyń ekonomıkalyq yntymaqtastyq jónindegi úkimetaralyq jáne jeke sektorlar komıssııasynyń 8-shi otyrysyn jedel ótkizýdiń mańyzdylyǵy atap ótildi.

Japonııa Qazaqstan ekonomıkasyna jalpy ınvestıtsııa kólemi 7 mlrd AQSh dollarynan asatyn 10 iri sheteldik ınvestorlardyń qataryna kiredi.