Seısmolog blogerdiń Almatydaǵy jer silkinisi týraly «boljamyna» qatysty pikir bildirdi

ALMATY. KAZINFORM - Blogerdiń Almatyda jer silkinisi týraly boljamyna qatysty Seısmologııalyq baqylaýlar men zertteýlerdiń ulttyq ǵylymı ortalyǵynyń basshysy Dáýlet Sársenbaev pikir bildirdi. 

Óńirlik kommýnıkatsııalar qyzmetinde ótken baspasóz máslıhaty barysynda ǵylymı ortalyq dırektory Dáýlet Sársenbaev psevdoseısmologtar men psevdosarapshylardyń boljamyna qatysty óz oıyn aıtty.

«Onyń 14 aqpannan keıin respýblıka aýmaǵynda kúshti jer silkinisi bolady degen boljamyna keletin bolsaq, shynyn aıtqanda, bul blogerler neni meńzep otyrǵanyn bilmeımiz. Olardyń negizderi qandaı? Olar tús kórme me, álde birdeńe paıdalanady ma? Bul qıyn suraq. Shyn máninde, biz kún saıyn 200-den astam parametrdi óńdeımiz, monıtorıng gıdrodınamıkalyq, gıdrohımııalyq, geofızıkalyq, deformatsııalyq protsesterdi jáne tipti bıologııalyq baqylaý arqyly júzege asyrylady. Osynyń negizinde biz seısmıkalyq jaǵdaıǵa boljam jasaımyz. Bıyl Almaty oblysynda kúshti joıqyn jer silkinisi kútilmeıdi», — dedi Dáýlet Sársenbaev.

Aıtýynsha, turǵyndar jer silkinisi jáne basqa da tótenshe jaǵdaılar kezindegi barlyq tártip erejesin naqty bilýi kerek. 

«Japonııany alyp qaraıyq — onda jer silkinisi únemi bolyp turady, biraq is júzinde zardap shekkender bolmaıdy. Taǵy da eske túsireıik — Almatyda jer silkinisi saldarynan zardap shekkender boldy ma? Joq, adamdar dúrbeleńnen zardap shekti. Al ol qaıdan shyqty? Jaǵdaıdy túsinbeý saldarynan, ártúrli jalǵan habarlamalar men memlekettik organdardan aqparattyń jetkiliksizdigi saldarynan boldy. Bul baǵytta jumys isteý kerek», — dedi sóz sońynda ÓKQ spıkeri.