Seýlde kóz jumǵan qazaqstandyqtyń máıitin elge jetkizý shyǵynyn Koreıa tarapy kótergen

ASTANA. QazAqparat – QR Syrtqy ister mınıstrliginiń resmı ókili Aıbek Smadııarovtyń aıtýynsha, Seýlde kóz jumǵan qazaqstandyqtyń máıitin elge jetkizý shyǵyndaryn Koreıa tarapy kótergen, dep habarlaıdy QazAqparat tilshisi.

«Bizdiń Seýldegi elshiligimiz qoldan kelgenniń bárin jasady. Kelesi kúni Koreıa tarapymen, Koreıanyń Syrtqy ister mınıstrligimen kelissózder júrgizilip, marqumnyń denesin Aqtóbe qalasyna deıin jetkizý shyǵynyn túgeldeı Koreıa tarapy kóteretini týraly ýaǵdalastyqqa qol jetkizdik», - dedi Aıbek Smadııarov.

Sondaı-aq ol máıit 3 qarashada Almaty qalasyna al 4 qarashada Aqtóbe qalasyna jetkizilgenin eske saldy

«Keıbir buqaralyq aqparat quraldarynda 1 qarashada máıit jetkizildi degen tekserilmegen aqparat shyqty. Ókinishke qaraı, áleýmettik jeli arqyly aqsha jınaýǵa tyrysqan josyqsyz adamdar toby bar. Sonymen biz Koreıa tarapy barlyq shyǵyndy tolyǵymen tólegenin aıtqymyz keledi», - dedi SІM resmı ókili.

Eske salsaq, Seýl qalasynda bolǵan qaıǵyly oqıǵa saldarynan bir qazaqstandyq qyz mert boldy.

Foto: Yonhap