Seýlde Astana týraly kórme ótip jatyr

ALMATY. QazAqparat - Koreıa elinde Qazaqstan astanasynyń 20 jyldyǵyna arnalǵan «Astana - Uly dala qazynasy» atty kórme ashyldy. Bul týraly Qazaqstan Respýblıkasy Tuńǵysh Prezıdenti - Elbasy qory baspasóz qyzmetine silteme jasap QazAqparat tilshisi habarlaıdy.

«Korea Foundation» ǵımaratynda Seýl turǵyndary men qonaqtaryna  Qazaqstannyń keń ólkesiniń sýretteri usynyldy. Mundaǵy basty ekspozıtsııa - Astana.

QR Tuńǵysh Prezıdenti - Elbasy qory men Koreıalyq «Korea Foundation» qory  arasynda seriktestik memorandýmǵa qol qoıyldy. Ekspozıtsııaǵa Qazaqstannyń Ońtústik Koreıadaǵy Tótenshe jáne Ókiletti elshisi Bahyt Dúısenbaev qatysty.

 

«Qorda ǵylymı bilimdik, mádenı aǵartýshylyq salaǵa basymdyq berilgen. Sondaı-aq, eki eldiń kúsh biriktirýine baǵyttalǵan jobalar bar. Halyqaralyq dıskýssııa alańyna retinde Qor janyndaǵy Álemdik ekonomıka jáne saıasat ınstýtynyń Astana klýby bekitilgen»,-dedi atalǵan Qordyń Almatydaǵy ókildiginiń dırektory Sergeı Tohtarov.

Kórme qonaqtary Qazaqstannyń qoǵam, saıasat, mádenıet qaıratkerlerimen tanysty. Qazaqstannyń ulttyq mereke kúnderi týraly aqparat alyp, ulttyq dástúrinen maǵlumat aldy. Sondaı-aq, respýblıkalyq saıajaılar men  qoryqtardy tamashalady. Sadjana Murzalıevanyń qobyzda oınaǵan  shyǵarmasy  atmosferany aıshyqtaı túsip, kórermenniń Qazaqstandy jete tanýyna múmkindik berdi. 

Kesh sońynda kelýshilerge Astana 20 jyldyǵyna arnalǵan albom taratyldy. «Astana - Uly dala qazynasy» kórmesi Seýlde 3 qyrkúıekke deıin jalǵasady.