Seýlde álemdegi eń úlken shabaqsyz sholý dóńgelegi attraktsıony salynady

SEÝL. QazAqparat - Ońtústik Koreıa astanasynda «Seýl dóńgelegi» dep atalatyn 180 metrlik shabaqsyz sholý dóńgelegi salynady, dep habarlaıdy QazAqparat CNN-ge silteme jasap.

Qala bıligi attraktsıon 2027 jyly qalanyń soltústik-shyǵysyndaǵy Hanyl saıabaǵynda ornatylatynyn málimdedi.

Shabaqtary joq sholý dóńgelegi - jańa ázirleme. Ádette sholý dóńgelekteriniń ortasynan ótetin shabaqtary bolady, biraq sońǵy birneshe jylda tehnologııa olarsyz aınalý múmkindigin beretindeı deńgeıde damydy.

Attraktsıon álemde shabaqsyz aınalatyn eń úlken aınalma dóńgelek bolady dep kútilýde.

«Seýl dóńgelegi» - buryn qoqys orny bolyp, qazir jasyl jobalar úshin paıdalanylatyn Sangam-donda ótip jatqan birneshe bastamanyń biri. Úkimettiń habarlaýynsha, ol kún energııasy sııaqty ekologııalyq taza tehnologııalardy paıdalanatyn bolady.

Attraktsıon qurylysy aıaqtalǵan soń onda árqaısysynda 25 adamǵa deıin syıyp ketetin 36 vagon bolady. Tolyq qýatyna shyqqannan keıin ol táýligine 11 792 adamdy qabyldaı alady.

Qazirgi ýaqytta álemde shabaqsyz aınalatyn eń úlken sholý dóńgelegi Qytaıdyń Shandýn provıntsııasynda ornalasqan. Onyń bıiktigi 145 metr.

Ótken jyldyń kúzinde BAÁ-da ashylǵan Ain Dubai attraktsıony álemdegi eń bıik aınalý dóńgelegi ataǵyn senimdi túrde ıelenedi. Onyń bıiktigi - 250 metr.