Seýl meri Helloýındegi qaıǵyly oqıǵa úshin keshirim surady

ASTANA. Renhap-QazAqparat – Seýl qalasynyń meri O Se Hýn 156 adamnyń ómirin qıǵan Helloýındegi oqıǵaǵa baılanysty keshirim surady, dep habarlaıdy QazAqparat Renhap agenttigine silteme jasap.

«Azamattardyń ómiri men qaýipsizdigine jaýapty Seýl meri retinde, men apat úshin sheksiz jaýapkershilikti sezinemin jáne keshirim suraımyn. Seýl qalasynyń ákimshiligi jerleý rásimi aıaqtalmaıynsha jáne osy apat saldarynan qaza tapqandardyń otbasylary, jaraqattanǵandar men qaıǵyǵa dýshar bolǵan barlyq azamattar kúndelikti ómirlerine oralǵansha, óziniń ákimshilik bıligin jumyldyrýǵa barynsha kúsh-jiger salady», - dedi mer qalalyq keńsede ótken baspasóz máslıhatynda.

Aıta ketsek, jergilikti BAQ-ta qala ákimshiligi men polıtsııanyń Ithevondaǵy jaǵdaıdy baqylaı almaǵany týraly másele qyzý kóterilip jatyr. Keıbir synshylardyń pikirinshe, Seýl qalasynyń ákimshiligi, Ensan aýdandyq keńsesi jáne polıtsııa Helloýın merekesinde 100 myńnan astam halyq jınalýy múmkindigin eskerip, jazataıym oqıǵalardyń aldyn alý sharalaryn qabyldaýy tıis edi.

Búgin polıtsııanyń arnaıy tergeý toby Seýl qalalyq polıtsııa basqarmasy, Ensan polıtsııa bólimi jáne taǵy alty keńsede polıtsııanyń Ithevondaǵy adamdardyń ólimine ákelgen áreketsizdigin tergeý aıasynda reıd júrgizdi. Buǵan deıin Ulttyq polıtsııa basqarmasy qaıǵyly oqıǵadan 4 saǵat buryn Ithevonda adamdar tym kóp jınalyp jatqany týraly 11 jedel shaqyrtý túskenin, biraq esh áreket jasalmaǵanyn moıyndaǵan edi.

Eske salsaq, Ońtústik Koreıa astanasynda Helloýın merekesin toılaý kezinde keminde 151 adam mert bolǵany habarlandy, onyń 19-y sheteldik.

QR Syrtqy ister mınıstrliginen málim etkendeı, qaza tapqandar arasynda bir otandasymyz boldy. Aqtóbe oblysynyń týmasy, 1996 jylǵy qazaqstandyq Koreıadaǵy joǵary oqý oryndarynyń birinde oqyp júrgen.

Foto: en.yna.co.kr