Serik Jumanǵarınniń tóraǵalyǵymen jańa Salyq kodeksi normalary talqylandy
ASTANA. KAZINFORM — Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen ótken Jobalyq keńseniń altynshy otyrysynda jańa Salyq kodeksiniń normalaryn ımplementatsııalaý máselesiniń kezekti toby talqylandy. Bul týraly Úkimettiń baspasóz qyzmeti habarlady.
Baý-baqsha qoǵamy: QQS boıynsha esepke turý kerek pe?
Otyrysta baý-baqsha kásipodaqtarynyń ótinishteri qaraldy. Baý-baqsha qoǵamdary tutyný kooperatıvi túrinde kommertsııalyq emes uıym retinde tirkeledi. QQS boıynsha mindetti tirkeý sheginiń 40 mln teńgege deıin tómendeýine baılanysty, QQS tóleýshi bolý mindetti me degen suraq týyndap otyr.
Qarjy vıtse-mınıstri Erjan Birjanov túsindirgendeı, tutyný kooperatıvi degenimiz — jalpy shyǵyndy jabý úshin múshelik jarna esebinen ortaq qor quratyn azamattardyń birlestigi. Mundaı jarna taýar nemese qyzmet úshin tólem bolyp sanalmaıdy, ıaǵnı QQS boıynsha salyq salynatyn aınalym dep tanylmaıdy. Tıisinshe, múshelik jarnany alǵan kezde QQS paıda bolmaıdy da, mundaı jarna boıynsha shot-faktýra jazylmaıdy. Osy sebepti, QQS boıynsha esepke turý qajettiligi joq.
QQS boıynsha mindet kooperatıv qosymsha kásipkerlik qyzmet júrgizip, taýardy nemese qyzmetti satýdan kiris alǵan jaǵdaıda ǵana týyndaýy múmkin.
Eger qyzmet jarna jınaýmen jáne ony kooperatıv músheleriniń qajettiligine jumsaýmen shektelse, salyq salynatyn tabys paıda bolmaıdy.
JJM ımporty kezinde QQS-tan bosatý
Jıynda halyqaralyq tasymaldaý kezinde áýe kemeleri paıdalanatyn janar-jaǵarmaı materıaly ımportyn QQS-tan bosatýdy kózdeıtin Salyq kodeksiniń 479-babynyń normalary talqylandy. Ol dıplomatııalyq nemese konsýldyq mekemeler tarapynan otyndy maqsatty paıdalaný týraly qosymsha rastaýdy kózdeıdi. Otyrysqa qatysýshylar mundaı talaptardy artyq dep tanydy. Artyq bıýrokratııany boldyrmaý úshin bul shart qoldanylmaıdy.
Rezıdent emesterdiń qyzmeti boıynsha shot-faktýra
2026 jyldan bastap rezıdent emesterden jumystar men qyzmetterdi satyp alý kezinde shot-faktýra jazyp berý talaby engiziledi. Bul rette QQS tóleýshi men tólemeıtinder úshin tártip ár túrli. Memlekettik kirister komıteti jaqyn arada osy normalardyń is júzinde qoldanylýy jóninde resmı túsinikteme beredi.
Ózin-ózi jumyspen qamtyǵandarmen jumys isteý kezindegi shyǵystar jáne aýyl sharýashylyǵy taýaryn óndirýshilerdiń ónim óndirisin rastaý
Uzaq qarastyrýdy jáne jan-jaqty taldaýdy talap etetin júıelik másele retinde, JShS-nyń múmkindigi boıynsha jalpyǵa birdeı belgilengen rejımde KTS boıynsha shyǵysty, eger tulǵa bir mezgilde osy seriktestiktiń quryltaıshysy bolyp tabylsa, ózin-ózi jumyspen qamtyǵandar úshin arnaýly salyq rejımin qoldanatyn jeke tulǵamen shartqa sáıkes, shegerimge jatqyzý máselesi qaraldy.
Qazirgi ýaqytta Salyq kodeksinde mundaı shyǵysty shegerimge jatqyzýǵa tyıym joq. Jeke tulǵanyń (onyń ishinde quryltaıshynyń) qosymsha mártebesi shegerimnen bas tartýǵa negiz bolmaıdy.
Bul rette ózin-ózi jumyspen qamtýshylar úshin rejım bastapqyda ózge kásipkerlik qyzmetti júrgizbeıtin adamdarǵa arnalǵany atap ótildi. Eńbek qatynastaryn azamattyq-quqyqtyq shartpen almastyrýǵa jol berilmeıdi.
Bul másele Jobalyq keńseniń kelesi otyrysynda da qaralady.
Sondaı-aq, arnaıy salyq rejımin qoldanatyn sharýa qojalyqtarynyń ónim óndirisin rastaý máselesi talqylandy. Bul aýyl sharýashylyǵy ónimin satý kezinde sur ımportty boldyrmaý úshin qajet. Eger mal sharýashylyǵynda maldyń shyǵý tegi aqparattyq júıe arqyly rastalsa, egin sharýashylyǵynda qadaǵalaý júıesi jumys isteıdi. Rastaý mehanızmi naqtylaýdy qajet etedi. Másele beıindi memlekettik organmen birlesip pysyqtalyp, Jobalyq keńsesiniń kezekti otyrysyna shyǵarylady.
Aıta ketelik búgin Premer-mınıstr Oljas Bektenov «Samuryq-Qazyna» AQ dırektorlar keńesiniń otyrysyn ótkizgen edi.