Serik Sápıev: Sportqa degen qyzyǵýshylyqty balanyń boıynda erte jastan oıatý qajet
Mádenıet jáne sport mınıstrliginiń Sport jáne dene shynyqtyrý isteri komıtetiniń tóraǵasy Serik Sápıev Prezıdenttiń buqaralyq sportty damytý tapsyrmasyna baılanysty qandaı sharalar qolǵa alynatynyn aıtyp berdi, dep habarlaıdy QazAqparat tilshisi.
«Prezıdent Qasym-Jomart Kemeluly Qazaqstan halqyna Joldaýynda jas erekshelikterine qaramastan, buqara arasynda salaýatty ómir saltyn nasıhattap, sportty damytý qajet ekendigin de aıtty. Bul óte mańyzdy mindet dep aıtar edim», - deıdi Serik Sápıev.
Jazǵy Olımpıada oıyndarynyń chempıony óz sózinde Mádenıet jáne sport mınıstrligi osy oraıda qarqyndy jumys júrgizip jatqanyn atap ótti.
«Mınıstrlik alǵa qoıǵan mindetterdi iske asyrýdyń aıasynda 2018 jyldyń qorytyndysy boıynsha halyqtyń 29,8 paıyzy dene shynyqtyrý jáne sportpen aınalysatyny belgili bolyp otyr. Bul respýblıkanyń sportpen shamamen 5,5 mln adamnyń aınalysatyyn bildiredi. 2019 jyldyń birinshi jartyjyldyǵynda respýblıka boıynsha 2,7 mıllıonnan astam adamdy qamtyǵan 27 myńnan astam sporttyq is-shara ótkizildi. Onyń ishinde 1,1 mıllıonnan astam adamdy qamtıtyn 16 myńnan astam sporttyq is-shara aýyldy jerlerde uıymdastyryldy», - deıdi ol.
Serik Sápıev sondaı-aq, Prezıdenttiń óz Joldaýynda sport ınfraqurylymyn damytyp, balalar jáne jasóspirimder sportyna basymdyq berý týraly tapsyrmasy oryndalatynyn aıtyp ótti.
«Halyq arasynda buqaralyq sportty damytyp, keńinen nasıhattaý úshin sportqa degen qyzyǵýshylyqty erte jastan bastap oıatý qajet. Balalar men jastardy sportqa baýlý – ult densaýlyǵynyń kepili. Jergilikti atqarýshy organdardyń usynǵan statıstıkasyna sáıkes, elimizde mektep jasyndaǵy balalardyń qatarynda 1,8 mln bala dene shynyqtyrý jáne sportpen aınalysady. Halyqtyń sportpen jappaı shuǵyldanýy úshin sporttyq ınfraqurylymdy damytý qajet. Elimizde 11,1 myń dene shynyqtyrý jáne sport nysany bar. Alaıda bul halyqtyń sporttyq nysandarǵa degen qajettiligin jabýǵa azdyq etedi. Búgin de biz 100 dene shynyqtyrý-saýyqtyrý keshenin salý tapsyrmasyn oryndaýdamyz», - deıdi ol.
Serik Sápıevtiń aıtýynsha, júrgizilgen taldaý jumystarynyń nátıjesinde, óńirlerde sport zaldarǵa degen qajettilik 1 mln 457 myń sharshy metrdi quraıtyny belgili boldy.
«Osy oraıda mınıstrlik 2019 jyly salynatyn jobalar tizimin naqtylady. 22 dene shynyqtyrý-saýyqtyrý kesheni, 2020 jyly - 34, 2021 jyly – 44 nysan salynady. Aımaqtarda dene-shynyqtyrý saýyqtyrý keshenderiniń 100, 160 jáne 320 oryndyq tıptik jobalary qarastyrylǵan. Joǵaryda atalǵan keshenderdiń qurylysy jergilikti bıýdjet jáne demeýshiler qarajaty esebinen júzege asyrylady. Buqaralyq sportty damytý – jergilikti atqarýshy organdar men barlyq deńgeıdegi sporttyq mekemelerdiń basty mindeti bolyp qala beredi», - dedi Serik Sápıev.
Eske sala ketsek, kúni keshe Qazaqstan halqyna Joldaýyn jarııalaǵan Memleket basshysy Qasym-Jomart Toqaev buqaralyq sportty damytýda keshendi baǵdarlama qabyldaý kerektigin málimdegen bolatyn.
«Ult densaýlyǵyn bekemdeý máselesi de óte ózekti. Barlyq jas sanattary arasynda buqaralyq sport túrlerin nasıhattaı berý kerek. Balalar úshin sporttyq ınfraqurylymnyń barynsha qoljetimdi bolýyn qamtamasyz etý kerek», - dedi Prezıdent.
