Sergek jaıaý júrginshilerdi ótkizbeıtin júrgizýshilerdi tirkeıdi
Sergek ıntellektýaldy júıesi jaıaý júrginshiler ótkelderinde adamdardy elemeıtin júrgizýshilerdi tirkeıtin bolady. Pılottyq joba Almatyda iske qosyldy. Kazinform bul týraly Polisia.kz-ke silteme jasap habarlaıdy.
«Taldaý kórsetkendeı, osy jyldyń 11 aıynda avtokólik dóńgelekteriniń astynda 556 jaıaý júrginshi qaza tapty, onyń 478-i jaıaý júrginshiler ótkelinde. Júrgizýshi tártibin arttyrý ólimmen aıaqtalǵan jol apattarynyń azaıýyna yqpal etedi», – dedi QR ІІM ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova.
Buzýshylyqtar QR ÁQBtK-niń 600-babyna sáıkes «Jaıaý júrginshilerdiń nemese jol qozǵalysynyń ózge de qatysýshylarynyń júrýine basymdyq bermeý» tirkeledi. Mysaly, eger avtokólik jaıaý júrginshiden keıin júrse, bul jol júrisi qaǵıdasyn buzý bolyp sanalmaıdy.
Al eger júrgizýshi jaıaý júrginshige jol bermese jáne toqtamasa, oǵan aıyppul salynady. Eger jaıaý júrginshi de, kólik quraly da bir qıylysý aımaǵynda bolsa, bul ákimshilik quqyq buzýshylyq bolyp tirkeledi.
«Bizdiń ıntellektýaldy júıe jol júrisi qaǵıdalaryn buzýdy tirkep qana qoımaı, jol-kólik oqıǵalarynyń aldyn alyp, yqtımal qaýipti júrgizýshilerdi anyqtaıdy. Jańashyldyqtardyń biri – jaıaý júrginshilerdi ótkizbeıtin júrgizýshilerdi tirkeý», – dep atap ótti ázirleýshiler.
Sonymen qatar ıntellektýaldy júıe pılottyq rejımde júrgizýshi men kólik quralynyń aldyńǵy oryndyqtarynyń jolaýshylarynda bekitilmegen qaýipsizdik beldigi sııaqty buzýshylyqtardy tirkeıdi.
