Sergek nege ShQO jolaýshy kóligi basqarmasymen sottasyp jatyr
ÓSKEMEN. KAZINFORM — Óskemende 5 jyldan asa ýaqyt jumys istegen «Sergek» kameralaryn ornatqan kompanııa byltyr jazda tenderdi jeńilip qaldy. Alaıda buǵan kelispeı, olar ShQO jolaýshy kóligi basqarmasyn sotqa berdi. Kazinform tilshisi máseleniń mánisine úńilip kórdi.
«Eski kameralardy ǵana qaldyryp ketti»
Óskemende 2018 jyly beınebaqylaý kameralaryn Sergek Group kompanııalar tobyna qarasty «Kórkem Telekom» JShS ornata bastady. Memlekettik-jekeshelik áriptestik aıasynda «Óskemendegi qoǵamdyq jáne jol qaýipsizdigi júıesin qurý» jobasyn iske asyrǵan kompanııa Shyǵys Qazaqstan oblysynyń jolaýshy kóligi jáne avtomobıl joldary basqarmasymen, polıtsııa departamentimen 5,5 jyldyq shart jasasqan bolatyn. Osylaısha, qala boıynsha 1 700 qoǵamdyq qaýipsizdik kameralary men 1 228 jol qaýipsizdigi kameralaryn ornatty.
Sharttyń qoldanylý merzimi 2024 jyldyń 26 sáýirinde aıaqtalǵan. Al odan birneshe apta buryn, naqty aıtqanda 4 sáýirde ShQO jolaýshylar kóligi jáne avtomobıl joldary basqarmasy Óskemen, Rıdder, Altaı qalalarynda qoǵamdyq jáne jol qaýipsizdigi júıesin keńeıtý jáne jańartý boıynsha memlekettik qyzmetterdi satyp alýǵa konkýrs jarııalady. «Daýdyń basy — Daırabaıdyń kók sıyry» demekshi, áńgimeniń bári osy jerden bastaldy.
Sebebi konkýrsta «Kórkem Telekom» JShS utylyp qaldy. Jeńimpaz bolyp «Satory Company LTD» JShS tanyldy. Bul másele týraly byltyrǵy jeltoqsan aıynda jýrnalıster QR Prezıdenti janyndaǵy Ortalyq kommýnıkatsııalar qyzmetiniń kóshpeli baspasóz konferentsııasynda Shyǵys Qazaqstan oblysynyń ákimi Ermek Kósherbaevtan suraǵan bolatyn.
— Konkýrsta jeńimpaz bolǵan kompanııa bizge qajetti qyzmetterdiń keń spektrin usyndy. Biraq eń bastysy, tsıfrlandyrýǵa bólingen qarjyǵa jasalatyn apparattyq-baǵdarlamalyq keshen memleket menshiginde bolady. Bul eń mańyzdy másele. Al «Sergek» kompanııasyna qatysty aıtar bolsaq, biz olarǵa tenderdi jeńip alǵan kompanııa jumys isteı bastaǵansha júıege qyzmet kórsetýdi jalǵastyra turýdy suradyq. Sol úshin aqsha tóleýge de daıyn boldyq. Alaıda qandaı da bir sebeptermen kompanııa jelilik jabdyqtyń bir bóligin tolyǵymen alyp tastap, eshqandaı baılanyssyz qalǵan eski kameralardy ǵana qaldyryp ketti. Quzyrly organdarǵa aryz da túsiripti. Qazir osyǵan qatysty sot protsesteri júrip jatyr. Barlyǵy qoldanystaǵy zańnama aıasynda sheshilýi kerek, — dep jaýap berdi ol.
Prokýratýra zańsyzdyqty anyqtady
Osy rette, bir mańyzdy jaıtty aıta ketýimiz kerek. 2024 jyldyń maýsym aıynda ShQO prokýratýrasy tekserý júrgizip, «Sergek» jobasyn iske asyrý kezinde bolǵan zańbuzýshylyqty anyqtady.
— Atalǵan joba aıasynda memlekettik bıýdjetten «Kórkem-Telekom» JShS-men 7 mlrd teńgeden astam somaǵa kelisimshart jasalǵan. Tekserý barysynda memlekettik qarajatty zańsyz tóleý faktileri anyqtaldy. Jobanyń quny 238 mln teńgege esh negizsiz ósken. Prokýratýra engizgen qadaǵalaý aktisinen keıin oblystyq jolaýshy kóligi jáne avtomobıl joldary basqarmasy negizsiz tólengen shyǵyndardy óndirý týraly talap-aryz berdi, — dep habarlady prokýratýrasynyń baspasóz qyzmetinen.
Sot sheshimimen talap-aryz tolyq kólemde qanaǵattandyryldy. Al apellıatsııalyq sot birinshi satydaǵy sot aktisin kúshinde qaldyrdy. Osylaısha, «Kórkem-Telekom» JShS memlekettik bıýdjetke 238 mln teńgeni qaıtardy. Bul «Sergek» kompanııasy men basqarma arasynda bári zańǵa saı bolmaǵanyn kórsetti.
Kompanııa málimdeme jasady
Ermek Kósherbaevtyń baspasóz konferentsııasynda «Sergek» kompanııasy jaıly aıtqanynan keıin respýblıkalyq BAQ-tarda bul týraly jappaı jazylyp jatty. 2025 jyldyń 10 qańtarynda Sergek Group kompanııalar toby resmı málimdeme jasady.
— Kompanııamyz ben Shyǵys Qazaqstan oblysyndaǵy «Sergek» jobasy týraly kóptegen jarııalanymdar men jalǵan aqparattyń taralýyna baılanysty jaǵdaıdy resmı túrde túsindirýdi jón dep sanaımyz. Sharttyń qoldanylý merzimi 2024 jyldyń 26 sáýirinde aıaqtaldy. Júıeniń úzdiksiz jumysyn qamtamasyz etý úshin 2 aıǵa qysqa merzimdi kelisim jasaldy. Bizdiki sekildi qalalyq qaýipsizdik júıeleri aqparattyq-kommýnıkatsııalyq ınfraqurylymnyń asa mańyzdy obektilerine (AKIAMO) jatatynyn jáne olarǵa ártúrli ýákiletti organdar, sonyń ishinde QR UQK jetekshilik etetinin atap ótken jón. Mundaı júıelerge qyzmet kórsetý úshin qoldanystaǵy sharttar nemese kelisimsharttar bolýy qajet. Óńirde shart aıaqtalǵanǵa deıin biz memlekettik áriptesterimizge negizdiń joqtyǵynan júıege qyzmet kórsetýdi toqtatýǵa májbúr bolatynymyz týraly jáne sharalar qabyldaý qajettiligi jaıly birneshe ret habarladyq, — delingen kompanııa saıtyna jarııalanǵan habarlamada.
Sondaı-aq Sergek Group kompanııalar toby ShQO jolaýshy kóligi jáne avtomobıl joldary basqarmasy jarııalaǵan jańa konkýrstaǵy buzýshylyqtardyń saldarynan áleýetti jetkizýshilerdiń sany shektelgendigin málim etti.
— Konkýrs mundaı jobalardy iske asyrýda tájirıbesi joq «Satory Company LTD» JShS paıdasyna aıaqtaldy. Keıingi aýdıt nátıjelerine sáıkes, «Satory Company LTD» jáne «RGM Global Group-qa» konkýrsqa qatysý jóninde berilgen ruqsattarda buzýshylyqtar anyqtalǵan. Іshki memlekettik aýdıt komıteti men QR Qarjy mınıstrligi janyndaǵy Apellıatsııalyq komıssııa sekildi ýákiletti organdar eki kompanııanyń da konkýrsqa jiberilgeniniń jáne «Satory Company LTD» JShS memlekettik satyp alýdyń jeńimpazy dep tanylǵanynyń zańsyz ekendigin rastady. Qazirgi ýaqytta «Kórkem Telekom» JShS konkýrstyq qujattamany jaramsyz dep tanýǵa jáne konkýrs nátıjeleriniń kúshin joıýǵa qol jetkizbekshi, — delingen málimdemede.
Basqarma basshysy ne deıdi?
Kompanııanyń jolaýshy kóligi jáne avtomobıl joldary basqarmasyna «ókpeleri qara qazandaı» eken. Endi olar óz durystyǵyn sot arqyly dáleldemek. Al bul málimdemege basqarma basshysynyń berer jaýaby qandaı? Osyny bilý úshin Kazinform redaktsııasy atynan saýalhat joldadyq.
— «Kórkem Telekom» JShS 2024 jyldyń 8 qarashasynda ShQO mamandandyrylǵan aýdanaralyq ákimshilik sotyna konkýrstyń qorytyndylaryn joıý, konkýrstyq qujattama men kelisimshartty zańsyz dep taný, oryndalýyn toqtatý jáne jolaýshy kóligi jáne avtomobıl joldary basqarmasy men «Satory Company LTD» JShS arasyndaǵy kelisimsharttardyń kúshin joıý týraly ákimshilik talap aryz bergen. 22 qarashada ShQO mamandandyrylǵan aýdanaralyq ekonomıkalyq sotyna da talap aryz jazdy. Qazirgi ýaqytta sot protsesteri jalǵasýda. Memlekettik mekeme joǵaryda kórsetilgen sot organdarynyń sheshimin kútedi jáne nátıjesi boıynsha zań aıasynda shara qoldanýy múmkin, — deıdi ShQO jolaýshy kóligi jáne avtomobıl joldary basqarmasynyń basshysy Nurjan Jumadilov.
Osy rette, basqarma men «Satory Company LTD» JShS arasynda qandaı kelisim jasalǵanyn, Óskemende aldaǵy ýaqytta qansha jańa kamera ornatylatyndyǵyn da suradyq.
— Konkýrsty jeńip alǵan kompanııamen jasasqan memlekettik satyp alý kelisimshartynyń quny 11,3 mlrd teńgeni quraıdy. Sonyń ishinde 2024 jáne 2025 jyldary 3,9 mlrd teńgeden, 2026 jylǵa 3,4 mlrd teńge bólý qarastyrylǵan. Jańa joba aıasynda Óskemen, Rıdder, Altaı qalalaryndaǵy beınekameralar sany 5,8 myńǵa deıin jetkiziledi. Kem degende 300 beınebaqylaý kamerasy úshin jasandy ıntellektýaldy analıtıkany qosý jáne konfıgýratsııalaý josparlanǵan. Jańa kelisimshartta birneshe avtokólikti bir ýaqytta túsire alatyn jetildirilgen radıolokatsııalyq ólsheý ádisine qoıylatyn talaptar bar. Sonymen qatar, osy radıolokatsııalyq ádis «Sergek» talap etkendeı, kameranyń jaǵdaıyn únemi baqylaýdy qajet etpeıdi jáne oǵan tehnıkalyq qyzmet kórsetý shyǵyndaryn azaıtady, — dep jaýap berdi N.Jumadilov.
Túıin
Toqsan aýyz sózdiń tobyqtaı túıini — ShQO jolaýshy kóligi jáne avtomobıl joldary basqarmasy konkýrstyń talapqa saı ótkenin, jeńimpaz atanǵan jańa kompanııamen jumys isteý «Sergekke» qaraǵanda tıimdi ekendigin málim etse, Sergek Group kompanııalar toby basqarmanyń zańǵa qaıshy áreket etip otyrǵandyǵyn alǵa tartyp, shaıqaspaı berispeıtindigin kórsetip otyr. Kimdiki durys, kimdiki burys ekendigin aldaǵy ýaqytta sot sheshedi. Másele redaktsııa tilshileriniń nazarynda bolmaq.
Eske salsaq, osyǵan deıin Óskemen turǵyny ShQO ákimin sotqa bergeni habarlanǵan.