Serbııa Prezıdenti «Altyn qyran» ordenimen marapattaldy
ASTANA. KAZINFORM — Serbııa Prezıdenti Aleksandr Výchıch Qazaqstannyń eń joǵary nagradasy «Altyn qyran» ordenimen marapattaldy. Bul týraly Aqordada mártebeli meımanmen kelissózderden keıingi BAQ ókilderine arnalǵan birlesken málimdeme barysynda Memleket basshysy Qasym-Jomart Toqaev aıtty.
— Serbııa — Qazaqstannyń Balqan túbegindegi mańyzdy ári senimdi seriktesi. Dostyq, ózara qoldaý jáne ortaq múdde elderimizdiń yntymaqtastyǵyna arqaý bolyp otyr. Men 2 jyl buryn Belgradqa jasaǵan saparymdy ystyq yqylaspen eske alamyn. Sol kezdegi kelisimderdiń tabysty iske asyrylyp jatqanyn erekshe rızashylyqpen atap ótkim keledi. Bıyl eki memlekettiń dıplomatııalyq qatynas ornatqanyna 30 jyl tolady. Prezıdent Aleksandr Výchıchtyń sapary osy mereıli mejege tuspa-tus kelip otyr, — dedi Memleket basshysy.
Prezıdenttiń atap ótýinshe, osy ýaqyt ishinde Qazaqstan men Serbııa arasynda barlyq deńgeıde ózara senimdi arqaý etken saıası dıalog ornady. Naqty sharttyq-quqyqtyq negiz qalyptasty.
— Úkimetterimiz nátıjeli jumys istep, parlamentaralyq baılanys nyǵaıyp keledi. Saýda-ekonomıka jáne ınvestıtsııa salasyndaǵy yntymaqtastyq kúsheıdi. Mádenı-gýmanıtarlyq baǵytta aıtarlyqtaı tabysqa qol jetkizdik. Halyqaralyq uıymdar aıasyndaǵy yqpaldastyǵymyz tereńdeı tústi. Buǵan Serbııa Prezıdentiniń qosqan úlesi orasan zor. Biz muny óte joǵary baǵalaımyz. Sondyqtan búgin joǵary mártebeli Prezıdent Aleksandr Výchıchty Qazaqstan Respýblıkasynyń eń joǵary nagradasy «Altyn qyran» ordenimen marapattadym. Bul nagrada qazaq eliniń Sizge jáne búkil Serbııa halqyna degen erekshe qurmeti, shynaıy iltıpatynyń belgisi. Myzǵymas dostyq pen qoldaýǵa negizdelgen seriktestigimiz aldaǵy ýaqytta da nyǵaıa beredi dep senemin, — dedi Qasym-Jomart Toqaev.
Serbııa Prezıdenti mundaı marapatty ıelený zor mártebe ekenin aıtyp, bul eki el arasyndaǵy qarym-qatynasty odan ári nyǵaıtýǵa yqpal etetinine toqtaldy.
— «Altyn Qyran» ordenin erekshe qurmetpen qabyl aldym. Bul marapat maǵan ózara baılanystarymyzdy arttyrý jáne beıbitshilik pen turaqtylyqty qamtamasyz etý jolyndaǵy ortaq iste zor jaýapkershilik júkteıdi. Keleshek urpaqtyń ıgiligi úshin Serbııa men Qazaqstannyń dostyǵy nyǵaıa berýine tilektespin, — dedi Aleksandr Výchıch.
Buǵan deıin Qasym-Jomart Toqaev Serbııa Prezıdenti Aleksandr Výchıchti Aqordada qarsy alǵan edi.